Нясвіжскія навіны 2025 год у многім знамянальны: гэта не толькі 80-годдзе Вялікай Перамогі, але яшчэ і 80-я гадавіна з дня ўтварэння ЮНЕСКА — міжнароднай
арганізацыі па пытаннях навукі, культуры і адукацыі. 20 гадоў сёлета спаўняецца з таго часу,
як на канферэнцыі ў паўднёва-афрыканскім Кейптаўне жылы і культурны комплекс рода Радзівілаў у г. Нясвіжы быў уключаны ў спіс
аб’ектаў Сусветнай спадчыны ЮНЕСКА і 10 год,
як быў утвораны клуб ЮНЕСКА “Кліа” —
адзіны ў Беларусі, які працуе на базе помніка ЮНЕСКА — музея-запаведніка “Нясвіж”.
Гэты клуб складаецца з навучэнцаў Нясвіжскага дзяржаўнага каледжа імя Якуба Коласа, а кіруе ім вядучы спецыяліст па музейна-педагагічнай дзейнасці Нацыянальнага гісторыка-культурнага музея-запаведніка “Нясвіж” Вячаслаў Мазалеўскі.
Ён і расказаў аб тым, з якімі напрацоўкамі клуб падышоў да свайго першага юбілею.
— Удзельнікі клуба дапамагаюць нашаму музею ў правядзенні рознага кшталту цікавых адукацыйных праграм, — патлумачыў Вячаслаў Іванавіч. — Некаторыя з яго членаў, як, напрыклад, Ганна Герасімовіч, нават ужо працуюць у нашым музеі. Яна зараз з’яўляецца ў нас малодшым навуковым супрацоўнікам і таксама прымае ўдзел у тэатралізаванай праграме — “Экскурсіі з элементамі тэатралізацыі і квэсту “Адважнае падарожжа Мікалая Хрыстафора Радзівіла Сіроткі”. З 1582 па 1584 год Мікалай Хрыстафор здзейсніў падарожжа на Блізкі Усход, таксама пабываў у Паўночнай Афрыцы, у Егіпце. Гэта падарожжа ён занатаваў у сваім дзённіку, падрабязна запісаўшы тое, што бачыў. Многія рэчы яго здзівілі.
Праз некаторы час гэты дзённік быў надрукаваны і мы яго ведаем пад назвай “Перыгрынацыя”. Усе гэтыя падзеі спецыяльна для юных наведвальнікаў нашага музея- запаведніка, школьнікаў не толькі з Беларусі, але і з Расіі, 24 і 25 сакавіка ўзнаўляюцца тэатралізавана (дадзеная праграма ажыццяўляецца менавіта падчас восеньскіх і вясенніх канікул на працягу двух дзён). Тэатралізацыя, дарэчы, праходзіць у інтэр- актыўнай форме. Героі, якія разыгрываюць сцэнкі, уступаюць у кантакт з наведвальнікамі музея, задаюць ім розныя пытанні. Дзеці адказваюць на іх і рашаюць рэбусы. Яны прадуманы так, што адказы на іх складаюць пэўнае слова. У дададзеным выпадку — назву кнігі, якую выдаў Мікалай Крыштоф Сіротка — “Перыгрынацыя”.
Аб сваіх уражаннях аб рабоце клуба “Кліа” расказалі некаторыя яго ўдзельнікі.
Паліна Жагалковіч:
— Я сама з Узды, вучуся на ІІ курсе Нясвіжскага дзяржаўнага каледжа імя Якуба Коласа на аддзяленні “Пачатковая адукацыя”. У клуб “Кліа” я патрапіла амаль разам з пачаткам свайго навучання ў каледжы — на І курсе. Да паступлення сюды на вучобу я не ведала, што ёсць такі клуб, і была вельмі прыемна здзіўлена, калі даведалася пра яго. Напачатку прайшла арганізацыйная сустрэча, пасля якой усё і закруцілася. Мы пачалі рыхтавацца да тэатралізацый, самастойна вучыць тэксты, а затым адпрацоўваць іх на гледачах. Я выконваю ролю Катажыны, памочніцы па гаспадарцы пры князю Мікалаю Крыштофу Ра- дзівілу. У нашай тэатралізацыі, якую, дарэчы, гістарычна дакладна прадумаў наш кіраўнік Вячаслаў Іванавіч, я раблю выгляд, што нічога не ведаю пра велікодны пост і разам з гледачамі “даведваюся” нешта новае на гэту тэму.
Удзел у клубе даў мне шмат новага станоўчага вопыту, новых ведаў з гісторыі замка, дапамог наладжваць стасункі з людзьмі. Я ўжо спрабавала сябе ў ролі экскурсавода і была бы рада атры- маць яшчэ большы досвед у гэтай справе.
Аляксандра Князюк:
— Я прыехала ў Нясвіж з суседняй Стаўбцоўшчыны і таксама вучуся ў Нясвіжскім каледжы імя Якуба Коласа на аддзяленні “Пачатковая адукацыя” на ІІ курсе. Я ўступіла ў клуб “Кліо” зусім нядаўна — літаральна ў мінулым месяцы, і мне тут вельмі падабаецца. Я ведала пра яго яшчэ з мінулага года, але не знаходзіла часу, каб стаць паўнавартасным удзельнікам, і вось, нарэшце, у мяне гэта атрымалася. Незвычайна пазнаваць замак, што называецца, “знутры”, глядзець на яго вачамі былых гаспадароў. Мне дасталася роля сястры Мікалая Радзівіла Крыштофа — Эльжбеты. Я гавару з юнымі экскурсантамі ад яе імя і гэта вельмі цікава. І сам яе вобраз — разважлівы, спакойны, удумлівы — вельмі падыходзіць да майго характару, і таму я выдатна адчуваю сябе ў гэтай ролі.
Ганна Лукашык:
—Я прыехала ў Нясвіж здалёк — з Валожынскага раёна і вельмі рада, што вучуся тут, таксама на ІІ курсе аддзялення “Пачатковая адукацыя”. Я ў нашай тэатралізацыі ўвасабляю другую сястру князя Мікалая Крыштофа Радзівіла — Хрысціну. Яна ўяўляе сабой зусім іншы характар — непаседлівая, завадная, яна ўсіх тармошыць, усіх падштурхоўвае да нейкіх дзеянняў, такіх цяпер называюць “генератар ідэй”.
Пра клуб “Кліо” я даведалася яшчэ на І курсе, адразу ўступіла ў яго і адразу пачала выконваць гэту ролю. Так што яна ў мяне ўжо адпрацаваная. Акрамя гэтага, нядаўна дапамагала праводзіць інтэлектуальную гульню “Кубак старога замка”. І, думаю, што наперадзе нас чакае яшчэ шмат цікавага.
Соф’я ЛЮБАНЕЦ.
