Нясвіжскія навіны У чацвер, 27 сакавіка, віншаванні са 100-гадовым юбілеем прымала жыхарка вёскі Копцеўшчына Гарадзейскага сельскага савета Надзея Буглак.
Павіншаваць доўгажыхарку з гэтай пачэснай датай прыбылі прадстаўнікі кіраўніцтва
раёна, раённага савета ветэранаў, раённага тэрытарыяльнага цэнтра сацыяльнага
абслугоўвання насельніцтва, мясцовай улады, ААТ “Нясвіжскія Астроўкі”,
раённай арганізацыі ГА “Белая Русь” і Гарадзейскага цэнтра культуры.
Надзея Канстанцінаўна з радасцю прымала падарункі і цёплыя словы віншаванняў, а на пытанне, у чым сакрэт яе доўгалецця, адказала:
— Трэба верыць, што дачакаешся лепшага жыцця. Вось я яго і дачакалася!
Шаноўная доўгажыхарка — сціплы і яскравы прыклад сапраўднага патрыятызму: тут, у Копцеўшчыне, яна нара- дзілася і вырасла, тут выйшла замуж за мясцовага хлопца, тут правяла ўсё сваё працоўнае і не толькі жыццё.
У 1965-м годзе, у росквіце сілаў, Надзея Канстанцінаўна перажыла вялікую трагедыю: з-за цяжкай хваробы з жыцця заўчасна пайшоў яе сын-падлетак. 29 гадоў таму не стала мужа, і дачка, Раіса Сержан, засталася для яе адзінай апорай.
Як расказала сама Раіса Іванаўна, яе матуля ўсё жыццё добрасумленна выконвала ўсе заданні кіраўніцтва мясцовай гаспадаркі і ўвогуле была майстрыхай на ўсе рукі: умела і прасці, і ткаць, і вязаць, і шыць, і вышываць. Сваімі рукамі выпякала на ўсю сям’ю свой, дамашні, вельмі смачны хлеб.
— Мама заўсёды была вялікай працаўніцай, — гаворыць пра самага роднага чалавека Раіса Іванаўна. — Яна вельмі любіць сваю родную зямлю, і заўсёды рада бачыць усё, што на ёй расце, любіць жыццё і людзей.
Разам з матуляй Р.І. Сержан жыве ўжо 15 гадоў, сама працавала да 59 гадоў, але ўрэшце рэшт, застаўшыся ўдавою, у 59 гадоў пайшла на пенсію і пераехала да мамы, бо і яна жыла адна. Пераязджаць да дачкі ў Баранавічы тая не захацела, і дачка прыехала да яе. Так яны і жывуць зараз, падтрымліваючы адна адну, шмат дапамагае ўнук Дзмітрый — і рамонт у хаце зрабіць, і прысядзібны ўчастак дагледзець.
Не забывае паважаную доўгажыхарку і дзяржава: некалькі гадоў таму за кошт мясцовага бюджэту у яе хаце быў зроблены рамонт электраправодкі і ўстаноўлены аўтаномны пажарны апавяшчальнік, яе рэгулярна наведваюць сацыяльныя службы.
Н.К. Буглак, акрамя дачкі, мае унука, дзвюх праўнучак і адну прапраўнучку. Усе яны таксама дружна прыехалі ў святочны дзень ва ўтульную бабуліну хату, каб павінша- ваць свайго дарагога чалавека з яе слаўным юбілеем і яшчэ раз з такой цудоўнай нагоды сказаць ёй словы любові і глыбокай пашаны.
Соф’я ЛЮБАНЕЦ.
