Па поклічы душы

Пост опубликован: 17.01.2025

У аўторак у Нясвіжскім сацыяльным пансіянаце “Бярозка”
ў рамках дабрачыннай акцыі “Ад усёй душы” пабываў
з візітам намеснік міністра ўнутраных спраў Рэспублікі Беларусь генерал-маёр міліцыі Дзмітрый Карзюк (на фота злева).

У сваім звароце да падапечных і калектыву ўстановы Дзмітрый Міхайлавіч адзначыў, што гэтая акцыя ўжо не першы год праводзіцца па ініцыятыве Кіраўніка нашай дзяржавы, і ў ходзе яе прадстаўнікі дзяржаўных органаў наведваюць людзей, якім патрэбны асаблівыя ўвага і клопат.

— Па даручэнні міністра ўнутраных спраў Івана Уладзіміравіча Кубракова сёння мы тут для таго, каб аказаць вам увагу, каб павіншаваць вас з Новым годам і светлым святам Калядаў, — сказаў Дзмітрый Міхайлавіч, звяртаючыся да прысутных. — Дазвольце мне ад усяго калектыву Міністэрства ўнутраных спраў Рэспублікі Беларусь пажадаць вам перш за ўсё моцнага здароўя, веры ў свае сілы. Няхай вам дапамагае Бог.

Падчас знаёмства Дзмітрыя Карзюка з умовамі
для пражывання людзей у пансіянаце

Высокі госць таксама выказаў упэўненасць у тым, што персанал пансіяната зробіць усё магчымае, каб людзям, што пражываюць ў ім, было цёпла і зручна.
Пасля гэтых добрых слоў Дзмітрый Карзюк уручыў установе ў асобе яго дырэктара Віктара Лябедзькі сертыфікат на каляровы тэлевізар і мікрахвалевую печ, якія зробяць знахо- джанне тых, хто пражывае ў пансіянаце, яшчэ больш камфортным. Акрамя гэтага, пастаяльцы “Бярозкі” атрымалі ад гасцей яшчэ і салодкія падарункі.
Асобным яркім сюрпрызам для ўсіх прысутных стаў і цудоўны канцэрт, у які ўвайшлі папулярныя эстрадныя хіты і песні з кінафільмаў у выкананні артыстаў беларускай эстрады, творчых міліцэйскіх калектываў і выхаванцаў ваенна-патрыятычных клубаў. У зале нібыта стала цяплей і святлей ад гарачых апладысментаў і ўсмешак удзячных гледачоў, якія пасля канцэрта шчыра дзякавалі артыстам і запрашалі прыязджаць да іх яшчэ.

Салодкія падарункі ад гасцей
для падапечных пансіяната

Нагадаем, што гісторыя пансіяната, які не так даўно адзначыў сваё 70-годдзе, пачалася ў 1954 годзе, калі ў невялікай вёсачцы Асмолава пад Нясвіжам адкрылі прытулак для дзяцей-сірот, якія засталіся без бацькоў пасля вайны. А ў 1955 годзе яго пастаяльцамі сталі інваліды і пенсіянеры. З кастрычніка 2021 года профіль установы быў зменены на псіханеўралагічны — у мэтах размяшчэння людзей не толькі з фізічнымі, але і з ментальнымі праблемамі.
З чэрвеня мінулага года ўстанова стала афіцыйна называцца сацыяльным пансіянатам “Бярозка” — даччынай структурай Міністэрства працы і сацыяльнай абароны Рэспублікі Беларусь. Сёння ў пансіянаце на поўным дзяржаўным забеспячэнні знаходзяцца 147 чалавек, якія часткова або поўнасцю страцілі здольнасць да самаабслугоўвання і маюць патрэбу ў доглядзе, бытавым і медыцынскім абслугоўванні.
І вельмі ўцешна бачыць, што гэтыя людзі атрымліваюць увагу і добрыя эмоцыі не толькі ад тых, хто павінен рабіць гэта па абавязку службы, але і ад тых, хто прыходзіць да іх па поклічы душы.