Нясвіжскія навіны 7 снежня ў горадзе Мар’іна Горка на юбілейным
ХХ абласным фестывалі «Напеў зямлі маёй»
сустрэліся лепшыя аматарскія калектывы Міншчыны.
Фестываль праводзіцца з 2001 года і ахоплівае ўсю жанравую палітру народнай творчасці, з’яўляецца адной з самых яркіх і значных па- дзей у культурным жыцці сталічнага рэгіёну.
З кожным годам фестывальныя старонкі набываюць новае гучанне, папаўняюцца новымі ідэямі і творчымі знаходкамі.
Па ўмовах конкурсу ў гэтым годзе неабходным патрабаваннем было ажыццяўленне пастановачнага нумару, заснаванага на літаратурных (вершы, аповесці, апавяданні) і песенных творах аўтараў, якія з’яўляюцца выхадцамі або прадстаўнікамі свайго рэгіёну.
У цэнтральным рэгіёне вялікая ўвага надаецца развіццю і падтрымцы аматарскіх калектываў, і гэты фестываль — таму пацвярджэнне.
Калектывы Нясвіжскага раёна прадставілі вясёлую песню «К цешчы на бліны» Леаніда Шышко. Рэжысёры — Кацярына Лабаза і Арцём Пінчук.
Заслужаны аматарскі калектыў Рэспублікі Беларусь «тэатр імя Уршулі Радзівіл», народны ансамбль музыкі і песні «Зараніца», вакальна-інструментальны ансамбль «Старыя прыяцелі», узорны ансамбль гарманістаў «Аношкаўскія музыкі», народны інструментальны ансамбль «Нясвіжскія лыжкары», вакальны ансамбль «Квінт» и танцавальны калектыў «Аксаміт» сталі Лаўрэатамі III ступені.
Ад усёй душы віншуем землякоў і жадаем ім далейшых творчых поспехаў!
Ірына ЕФІШОВА.
