Нясвіжскія навіны У гэтым годзе з 1 па 25 снежня ў каталіцкім касцёле мы перажываем Адвэнт. Адвэнт з лацінскай мовы тлумачыцца як радаснае чаканне. Каго ж мы чакаем? Зразумела, як хрысціяне мы чакаем прыйсця нашага Пана Езуса Хрыста, а гэта значыць, Божага Нараджэння. Такім чынам, Адвэнт не з’яўляецца постам, ён мае іншы характар. Аднак на час адвэнту каталіцкі касцёл прапануе рабіць пастановы, каб выкараніць з нашага жыцця тое, што найбольш перашкаджае нам сустрэцца з Богам. Гэта можа быць адрачэнне ад таго, што нас знявольвае, напрыклад, гаджэтаў, сацыяльных сетак, тэлевізара і г.д. На час Адвэнту заахвочваем устрымацца ад гучных забаў, больш разважаць над сваім жыццём праз прызму Святога Пісання і больш здзяйсняць учынкаў міласэрнасці. Дзеля гэтага ў нашым касцёле ў Нясвіжы ў гэты перыяд ла- дзіцца спецыяльная акцыя “Ад сэрца да сэрца”, падчас якой валанцёры каталіцкай дабрачынай арганізацыі “Карытас” нашай парафіі збіраюць падарункі для людзей патрабуючых, якія перададуць для іх у перыяд Божага Нараджэння. У асноўным гэта падапечныя сацыяльнага пансіянату “Бярозка”, аддзялення забеспячэння кругласутачнага знаходжання для грамадзян пажылога ўзросту інвалідаў РТЦСАН у Лявонавічах і тыя, хто знаходзіцца на ложках сястрынскага дагляду ў Гарадзеі. Усіх ахвочых запрашаем далучыцца да акцыі міласэрнасці.
Для больш глыбокага перажывання і чакання Нараджэння Пана касцёл прапануе таксама добрую традыцыю спецыяльных набажэнстваў. Гэта Раратнія святыя імшы. Зазвычай гэтыя набажэнствы, у часе якіх мы праслаўляем Марыю і разам з Ёю чакаем Нараджэння Хрыста, адбываюцца на світанні. У касцёле ў Нясвіжы гэтыя службы адбываюцца кожную сераду і суботу ў 6.45.
Таксама для больш глыбокага перажывання Адвэнта мы выкарыстоўваем некаторыя сімвалы. Галоўнымі сімваламі гэтага перыяду з’яўляецца свечка і вянок. Полымя свечкі прыносіць цяпло і святло ў змрочныя, зімовыя дні, засцерагае ад злых сіл, паказвае шлях дадому.
Лічыцца, што ўпершыню вянок Адвэнту з’явіўся ў Нямеччыне. Ён робіцца з яловых альбо хваёвых галінак, змацоўваецца у круг. На вянку ўсталёўваецца 4 свечкі — сімвалы чатырох тыдняў Адвэнту, якія запальваюць у кожную нядзелю.
У апошнюю, чацвёртую нядзелю Адвэнту, над вянком гараць усе свечкі, абвяшчаючы хуткі наступ Каляд. Свечкі сімвалізуюць 4 пары года, а вянок — гадавы цыкл.
Свечкі на адвэнтовым вянку маюць сваё сімвалічнае значэнне.
У першы дзень Адвэнту запальваюць першую свечку, якая называецца Свечка Прароцтва. У гэты дзень у касцёле і ў дамах вернікаў чытаюцца прароцтвы аб нараджэнні Месіі. Варта адзначыць, што ў Бібліі змяшчаецца больш за трыста прароцтваў, звязаных жыццём, служэннем і ахвярай на крыжы Езуса Хрыста. Прарочыя пасланні, напісаныя за сотні гадоў да іх здзяйснення, заўсёды служылі адным з найгалоўнейшых доказаў праўдзівасці Евангелля, таму для хрысціян вельмі важна ведаць іх і расказваць сваім дзецям.
У другую нядзелю Адвэнту запальваюць першую свечку і другую, якая называецца Віфлеемская. Яна сімвалізуе прышэсце на зямлю Месіі. Калі Пан Езус прыйшоў у свет, будучы народжаны ад Дзевы Марыі.
У трэцюю нядзелю Адвэнту запальваюць першыя дзве свечкі, а таксама трэцюю, якая называецца — Свечка Пастухоў. Яна сімвалізуе нараджэнне Пана ў сэрцы чалавека праз веру ў святое Божае Слова. Як пастухі ўбачылі Збавіцеля на свае вочы і ўверавалі, так і мы можам бачыць сёння Збавіцеля вачыма сваёй веры. Свечка пастухоў таксама сімвалізуе дабравестку, калі вернікі дзеляцца сваёй верай, падобна пастухам, якія расказалі ўсім пра бачанне анёлаў і нараджэнне Хрыста ў Віфлееме.
У чацвёртую нядзелю на вянку Адвэнту запальваюць першыя тры свечкі і далучаюць да іх апошнюю — Анёльскую Свечку. Яна сімвалізуе другое прышэсце Збавіцеля ў славе са святымі Анёламі, каб захапіць усіх сапраўдных вернікаў з Сабою на нябёсы.
Усім каталікам жадаю плённага перажывання Адвэнту, а таксама і ўсім людзям добрай волі.
З пашанаю пробашч парафіі Божага Цела ў Нясвіжы
ксёндз канонік Пётр ШАРКО.
