Нясвіжскія навіны Узорны танцавальны калектыў “Онікс” Нясвіжскай дзіцячай школы мастацтваў нядаўна стаў лаўрэатам І ступені міжнароднага фестывалю дзіцячай творчасці “Залатая пчолка”, што праходзіў у Клімавічах. Нашы юныя танцоры сталі пераможцамі ў намінацыі “Калектывы народна-сцэнічнага танца” ва ўзроставай катэгорыі 9 — 12 гадоў.
— Гэты конкурс праходзіў у два туры — першы адборачны і фінал, — расказала кіраўнік “Онікса” Кацярына Лабаза. — Мы рыхтаваліся да гэтага конкурсу са жніўня. Дзеці за тры месяцы вывучылі новы нумар “Крутуха” — адзін з самых складаных у вянку беларускіх танцаў.
У гэтым складзе нашага калектыву 10 дзяўчынак і 10 хлопчыкаў. Нягледзячы на вялікую колькасць юных танцораў, паміж сабой яны вельмі дружныя і заўсёды гатовы прыйсці на дапамогу адзін аднаму.
Кацярына Рыгораўна таксама падзякавала аддзелу ідэалагічнай работы, культуры і па справах моладзі райвыканкама ў асобе яго начальніка Людмілы Вітко за падтрымку і дапамогу з транспартам.
Цяпер “Онікс” рыхтуецца да новых вяршыняў. Улетку плануецца паездка ў расійскі Сочы, у танцавальную акадэмію, дзе дзеці змогуць атрымаць майстар-класы па сучасных і народных танцах у вядучых харэографаў краіны-суседкі.
Лілія ІВАНЕНКА.
