1 кастрычніка Беларусь адзначыла Дзень пажылых людзей — свята павагі да людзей старэйшага
пакалення, іх мудрасці і прызнання заслуг
перад грамадствам. На Нясвіжчыне таксама
прайшлі традыцыйныя акцыі, святочныя
“агеньчыкі”, сяброўскія сустрэчы з былымі
работнікамі арганізацый і прадпрыемстваў.
У раённым цэнтры культуры і адпачынку было арганізавана свята “Ад усёй душы, з паклонам і любоўю”, якое аб’яднала ветэранаў працы, актывістаў грамадскіх аб’яднанняў раёна, пераможцаў штогадовага конкурсу “Лепшы падворак-2024”.
Ад самага парога ўдзельнікаў мерапрыемства віталі работнікі Нясвіжскага РТЦСАН, разам з пажаданнямі добрага настрою яны дарылі букеты асенніх кветак.
У фае РЦК працавала выстава вырабаў народных майстроў Нясвіжчыны, сярод якіх былі Алена Хоміч, Таццяна Богдан, Ірына Лукашэвіч, Наталля Рыбалка, Таццяна Еўдакіменка і іншыя.
Тут жа свае паслугі карыстальнікам пенсійных картак прапанавалі прадстаўнікі цэнтра банкаўскіх паслуг №526 ААТ “Белаграпрамбанк”.
Прагучалі гукі святочных фанфар, і са сцэны Белай залы РЦК “Песенькай пра добры настрой” танальнасць святу задалі ўдзельнікі хору ветэранаў працы “Аптымісты” пад кіраўніцтвам Ірыны Латушкі.
Далей гучалі самыя цёплыя віншаванні ў адрас людзей старэйшага пакалення. З нагоды асенняга свята дабрыні і павагі да ўдзельнікаў мерапрыемства звярнулася начальнік упраўлення па працы, занятасці і сацыяльнай абароне Нясвіжскага райвыканкама Таццяна Толсцік. Выказаўшы словы ўдзячнасці за працу на карысць любай Нясвіжчыны і пажаданні даўгалецця, яна падкрэсліла:
— Ваша праца і заслугі перад роднай Беларуссю з’яўляюцца асновай нашага нацыянальнага падмурку. Таму ў нашай краіне клопат пра старэйшае пакаленне заўсёды сярод прыярытэтных напрамкаў. Дзякуй, што і сёння вы — прыхільнікі актыўнага ладу жыцця, што многія з вас працуюць, прымаюць актыўны ўдзел у мерапрыемствах грамадскіх арганізацый, што сваім вопытам і мудрасцю з’яўляецеся прыкладам у выхаванні моладзі, — падкрэсліла Таццяна Васільеўна.
На працягу цэлай гадзіны ў раённым цэнтры культуры гучалі віншавальныя “паштоўкі”, адрасаваныя віноўнікам урачыстасці. Музычныя падарункі ўручалі ансамбль песні “Элегія” (кіраўнік Тамара Прыгун), дуэт у складзе Ігара Дубешкі і Жанны Чучман, салісты Сяргей Калеснікаў і Таццяна Кунігель, народны ансамбль песні “Млечны шлях” і іншыя. Даспадобы гледачам прыйшоўся нумар самых юных артыстаў — малодшага складу ўзорнага танцавальнага калектыву “Онікс” Нясвіжскай дзіцячай школы мастацтваў, якія дэбютавалі ў гэты дзень.
Пад дружныя апладысменты прысутныя віталі пераможцаў раённага конкурсу “Лепшы падворак-2024”. Цырымоніі ўзнагароджвання папярэднічаў відэафільм пра лепшых гаспадароў Нясвіжчыны, сядзібы якіх радуюць суседзяў, вяскоўцаў і гасцей рэгіёну сваім прывабным выглядам.
Узнагароджванне прайшло па намінацыях. Згодна з рашэннем арганізацыйнага камітэта, у намінацыі “Лепшы куток для адпачынку” узнагароджана сям’я Святланы і Уладзіміра Ціхонка. У намінацыях “Залатыя рукі” і “Любоў да зямлі” дыпломы ўручаны Вользе Ладзята і Мікалаю Курнаеву адпаведна. Намінацыя “Стыль і гармонія” прынесла адзнаку сям’і Зінаіды і Уладзіміра Аляшкевіч.
Дыплом І ступені конкурсу прысуджаны сям’і Марыі і Валерыя Грашчанка. Ганаровае ІІ месца — у сямейнай пары Алены і Мікалая Чухлей. Бронзу конкурсу “Лепшы падворак-2024” раздзялілі Таіса Аліноўская і Люся Куніца. Гаспадыням уручаны дыпломы ІІІ ступені.
Кожны момант раённага свята, які агортваў цёплай атмасферай людзей шаноўнага ўзросту, сведчыў аб павазе да іх і прызнанні іх заслуг як абавязковай прыкметы здаровага цывілізаванага грамадства.
Инна ВАСИЛЕВИЧ 
