Нясвіжскія навіны Праўленне СВК “Агракамбінат Сноў” штогод заключае дагавор з Беларускім дзяржаўным аграрна-тэхнічным універсітэтам на работу
ў гаспадарцы студэнцкага атрада “Звязда”. “Сноў” служыць для будучых
інжынераў добрай базай у практычным навучанні.
А яны становяцца для хлебаробаў запатрабаванымі памочнікамі ў гарачы час палявых работ.
Студэнт БДАТУ Сяргей Амшэй абслугоўвае
бульбаўборачны камбайн, яго задача —
каб тэхніка працавала бездакорна. Калі здараецца паломка, ліквідуюць яе разам з механізатарам
Усё задавальняе ў агракамбінаце
студатрадаўца Марка Курмысу
Студэнт Віталь Бычкоў сочыць за работай
плюшчыльнага агрэгата зерня кукурузы
Для гэтага старшыня агракамбіната Мікалай Радаман едзе ў навучальную ўстанову, сваю альма-матэр, сустракаецца са студэнтамі. Дарэчы, сёлета пабываў у іх на ўрачыстасці ў першы дзень навучальнага года. Яму, заслужанаму работніку сельскай гаспадаркі Беларусі, было што сказаць будучым спецыялістам сельгасвытворчасці.
Перавага пры адборы ў атрад “Звязда” аддаецца тым, хто мае правы на ваджэнне грузавых аўтамабіляў, трактараў, хто закончыў каледж, адслужыў у арміі — юнакам больш дарослым, самастойным. Бывае, што ёсць хлопцы без правоў на ваджэнне, тады яны працуюць слесарамі.
— Мы іх засяляем у інтэрнат сельгаспрадпрыемства, дзе ёсць усе камунальныя і бытавыя зручнасці, — расказвае старшыня прафкама Наталля Вішнякова. — Праводзім інструктаж па тэхніцы бяспекі. Выдаём спецадзенне. Для іх прадугледжаны абеды і вячэра. І ўсё гэта — бясплатна. А зарплату яны атрымліваюць за выкананы аб’ём работы.
Летась у гаспадарцы працавалі 18 студатрадаўцаў, сёлета — 15. Іх працоўны семестр доўжыцца з 1 ліпеня да 19 кастрычніка. Работы хапае. Так, падчас жніва памочнікамі камбайнераў былі Віталь Бычкоў і Данііл Макоўскі. Аляксандр Булойчык і Аляксей Бацько на аўтамашынах МАЗ-5551 перавозілі збожжа на зернетаках, абслугоўвалі сушылкі. На рахунку першага — 3700 тон, на рахунку другога — 2800 тон. Разам з работнікамі агракамбіната — пераможцамі спаборніц- тва на жніве іх ушаноўвалі на сноўскіх “Дажынках”.
Удзельнічаюць юнакі і ў грамадскім жыцці. Напрыклад, былі ў складзе дэлегацыі агракамбіната на раённых “Дажынках”, неслі ў святочнай калоне інсталяцыю.
У Снове студэнтам падабаецца. Кажуць, адзін з іх, Юрый Янушкевіч, агучыў думку, што перавядзецца на завочнае навучанне і застанецца тут працаваць.
Мы пагутарылі з першакурснікам агра-механічнага факультэта Маркам Курмысам, занятым на адвозцы зялёнай масы кукурузы з поля.
— Прынялі нас у гаспадарцы добра, расказалі пра агракамбінат, пра сам аграгарадок, далі работу, — расказаў юнак. — Я закончыў каледж, магу працаваць на тэхніцы. Адвожу кукурузу ад кормаўборачнага камбайна. У дзень максімальна бывае да 200 тон зялёнай масы, калі здараецца паломка — меней. Старэйшыя таварышы нам падказ- ваюць, дапамагаюць.
Тамара ПРАЛЬ-ГУЛЬ.
Фота Ганны КІСЕЛЬ.
