Софья ЛЮБАНЕЦ Сёння адзначыў заканчэнне жніва — аднаго з самых галоўных этапаў сельскагаспадарчага года — флагман аграрнай галіны нашага раёна СВК “Агракамбінат Сноў”. Па добрай традыцыі на свяце дажынак тут аддалі даніну заслужанай павагі людзям, якія ўклалі ў няпростую працу хлебароба душу, веды, уменне і вопыт і зрабілі ўсё магчымае, каб выканаць ускладзеную на іх вялікую місію — забяспечыць харчовую бяспеку краіны.
Раздзяліць са снаўчанамі гэты радасны момант прыбылі намеснік старшыні райвыканкама — начальнік упраўлення сельскай гаспадаркі і харчавання райвыканкама Таццяна Жук, дырэктар ААТ “17 Верасня” Арцём Шастапёраў і намеснік старшыні праўлення СВК “Агракамбінат Сноў” — упраўляючы ААТ “Нясвіжскі райаграсервіс” Яўген Пякарчык.
Свята пачалося з уручэння апошняга дажыначнага снапа кіраўніку гаспадаркі Мікалаю Радаману, які яму паднеслі галоўны аграном Аляксандр Шаманаў, камбайнер Сяргей Вайняк і вадзіцель Сяргей Браусевіч.
Ад імя кіраўніцтва раёна і сябе асабіста снаўчан павіншавала з выдатнымі вынікамі жніва Таццяна Жук. Яна шчыра падзякавала ім за плённую працу і ўзнагародзіла Падзякай старшыні райвыканкама агранома Дзмітрыя Данількевіча, а Падзячнымі пісьмамі старшыні райвыканкама — інжэынера-механіка Сергея Бабка і тэхнолага цэха па вытворчасці камбікармоў Дзмітрыя Рачка.
Таццяна Мікалаеўна таксама ўручыла Падзякі раённай прафсаюзнай арганізацыі Беларускага прафсаюза работнікаў АПК аператарам працэсу апрацоўкі збожжа Дзяніса Шарапу і Генадзію Мітрафанову, электрагазазваршчыку Аляксандру Пазняку, слесарам-сантэхнікам Аляксандру Лапатцу, Ігару Панцялееву і Леаніду Шаўко, электраманцёрам Віктару Сасіму і Аляксандру Маскаленчыку.
Асаблівыя словы ўдзячнасці і гонару за сваіх працаўнікоў адрасаваў хлебаробам гаспадаркі старшыня СВК “Агракамбінат Сноў” Мікалай Радаман. Ён адзначыў, што дасягненне лепшага ў раёне выніка па ўраджайнасці збожжавых — 102,2 ц/га — стала магчымым толькі дзякуючы граматнай, зладжанай і добрасумленнай працы ўсіх удзельнікаў вытворчага працэсу ад галоўных спецыялістаў да механізатараў, і кожны з іх зрабіў свой важны ўнёсак у агульную справу.
Мікалай Вячаслававіч таксама узнагародзіў пераможцаў спаборніцтва ўнутры гаспадаркі. Сярод камбайнераў імі сталі Сяргей Вайняк, Аляксандр Грынаш, Сяргей Гаргун. Сярод вадзіцеляў — Сяргей Браусевіч, Алег Віннічак, Сяргей Радаман. На сушцы збожжа лепш за ўсіх сябе паказалі Дзмітрый Рачок і Андрэй Лазоўскі, Мікалай Рэут і Сяргей Якавец.
Узнагароды з рук кіраўніка сельгаспрадпрыемства атрымалі і многія іншыя добрасумленныя працаўнікі “Снова”, якія выдатна паказалі сябе не толькі на жніве, але і на веснавых палявых работах.
Свята не было б сапраўдным святам без музыкі і песень. Імі ўдзельнікаў урачыстасці парадавалі ўдзельнікі ансамбля Сноўскага сельскага цэнтра культуры “Каларыт”. У іх выкананні прагучалі цудоўныя песні, прысвечаныя роднай беларускай зямлі і людзям, якія на ёй працуюць.
Соф’я ЛЮБАНЕЦ.
