Софья ЛЮБАНЕЦ Як вядома, асноўная дзейнасць Нясвіжскай доследнай навуковай станцыі па цукровых бураках НАН Беларусі заключаецца ў навуковай рабоце па праблемах буракаводства, прапагандзе і садзейнічанні асваенню навуковых распрацовак у сельскагаспадарчай вытворчасці, у тым ліку — і ў насенняводстве збожжавых культур.
Як расказаў намеснік дырэктара станцыі Віктар Гадун, за доследнай станцыяй замацавана 612 гектараў зямлі. З іх 408 га займае збожжавая група: 91 га азімай пшаніцы, 98 — азімай трыцікале, 37,5 га азімага ячменю і 65 — яравога, 75 га яравой пшаніцы, 44 — яравой трыцікале.
Азімай пшаніцы сёлета намалацілі 538 тон 680 кг пры ўраджайнасці 59,2, азімай трыцікале — 520 тон 510 кг пры ўраджайнасці 53,1 ц/га. Больш за іншыя культуры пацярпеў ад спёкі і засухі азімы і яравы ячмень: азімы даў толькі 143 тоны 100 кг пры ўраджайнасці 40,9 ц/га, яравы — 225 тон 380 кг пры ўраджайнасці 34,7 ц/га. Яравой пшаніцы атрымалі 299 тон 600 кг, яе ўраджайнасць склала 40 ц/га, яравой трыцікале — 198 тон 410 кг пры ўраджайнасці 45,1 ц/га.
Паколькі доследная навуковая станцыя па цукровых бураках у датычнасці да збожжавых выступае як насенняводчая гаспадарка, то атрыманы на яе палетках ураджай ідзе на вытворчасць высокіх рэпрадукцый насення — суперэліты і эліты. Гэта работа — адзін з важных накірункаў дзейнасці станцыі, якая прапаноўвае гаспадаркам Мінскай вобласці і не толькі ім высакаякаснае насенне са сваіх пітомнікаў размнажэння.
Сярод сартоў, якія высяваліся на станцыі, Віктар Іванавіч адзначыў сорт азімай трыцікале “Гродна”, тры гады таму ўнесены ў рэестр сартоў і ўжо запатрабаваны на рынках Беларусі, азімай пшаніцы — “Амелія”, якая нават на не самых урадлівых глебах станцыі дала ўраджай у 60 ц/га, ячменю — “Кларнет”. Усе сарты — беларускай селекцыі.
Доследная станцыя размешчана на глебах, 85 працэнтаў з якіх — пясчаныя і падсцілаемыя пяскамі. Дождж праходзіць праз іх, як праз сіта, і нават невялікая засуха працягласцю ў тыдзень ужо негатыўна ўплывае на пасевы, прытым асабліва на яравыя. Аднак, дзякуючы строгаму захаванню тэхналогій вырошчвання, асабліва — выкарыстанню арганічных угнаенняў, тут здолелі выйсці на ўзровень мінулага года: сярэдняя ўраджайнасць склала 47,2 цэнтнера з гектара. Дапамагло і тое, што большая стаўка зараз зроблена на азімы клін.
Аляксандр Ігнатчык працуе механізатарам на доследнай станцыі па цукровых
бураках 19 гадоў.
За гэты час яму даводзілася выконваць мноства сельскагаспадарчых работ, і ўсе —
з нязменнай адказнасцю і акуратнасцю, без якіх немагчымая паспяховая работа станцыі. На сёлетнім жніве ён убіраў збожжавыя палеткі станцыі на камбайне “Палессе GS-12” у пары з камбайнерам Сяргеем Цімошчанкам, намалаціўшы тысячу з лішкам тон. У час, калі быў зроблены здымак, Аляксандр Мікалаевіч збіраўся рыхтаваць да выезду ў поле свой прычапны агрэгат “Аміці-300”, прызначаны для ўборкі доследных дзялянак салодкага кораня
Невялікая частка ўраджаю застанецца для сябе, для сяўбы на наступны год, а каля 1200 тон пойдзе на рэалізацыю. Некаторая колькасць будзе таксама рэалізавана як фуражнае зерне.
Уборка збожжавых на станцыі была праведзена сіламі надзейных, дасведчаных працаўнікоў: экіпажа ў складзе старшага камбайнера Аляксандра Ігнатчыка і камбайнера Сяргея Цімошчанкі, камбайнераў Аляксея Раўгейшы і Яўгена Жданюка, якія працавалі па адным, камбайнера Івана Дзішука, які ўбіраў доследныя дзялянкі. Свой важкі ўклад у паспяховае правядзенне жніва ўклалі і вадзіцелі — Мікалай Корсак і яго сын Андрэй. Яны і забяспечылі ўсю перавозку ўбранага збожжа.
Жніво скончылася. Праводзіцца прасаванне і вывазка саломы з палёў, лушчэнне іржышча, палі рыхтуюцца да сяўбы азімых.
Соф’я ЛЮБАНЕЦ.
