Нясвіжскія навіны Нясвіжчына першай у Мінскай вобласці сёлета завяршыла жніво, а працаўнікі ААТ «17 Верасня» завяршылі яго першымі ў раёне, паказаўшы выдатныя вынікі. Менавіта ў гэтай гаспадарцы з’явіліся першыя двухтысячнікі ўборачнай кампаніі — вадзіцель Мікалай Зенько і камбайнер Сяргей Зенько.
Агульная плошча сельгасугоддзяў гаспадаркі — 4537 гектараў, з якіх 3,5 тысячы — ворыва. Асноўная культура — кукуруза, акрамя яе, у ААТ «17 Верасня» вырошчваюць цукровыя буракі, азімы ячмень, рапс і пшаніцу.
Тут актыўна развіваецца жывёлагадоўля: на сённяшні дзень гаспадарка займае першае месца ў раёне па шчыльнасці жывёлы. Відавочна, што для ўтрымання такога пагалоўя неабходна мець дастатковую кармавую базу.
— Два гады таму наша гаспадарка трапіла ў праграму меліярацыі, — расказвае Арцём Шастапёраў. — дзякуючы гэтаму стала магчымым ўвесці ў абарот каля 300 гектараў сельгас- угоддзяў. Зразумела, гэта землі пасля меліярацыі. У гэтым годзе амаль на 250 га ідзе перазалужэнне, у планах правесці яго яшчэ на 150 гектарах. Увогуле, наша агранамічная служба карыстаецца інтэнсіўнымі метадамі: з года ў год павялічваецца фонд мінеральных угнаенняў, аб’ём унясення арганічнай падкормкі на гектар. Таксама мы працуем з макра- і мікраэлементамі, падбіраем сарты, адным словам, робім усё магчымае для павелічэння ўраджайнасці сельскагаспадарчых культур.
На фінішы ўборачнай кампаніі вераснёўцы паказалі агульную ўраджайнасць 76 ц/га, у прыватнасці, пшаніцы — 77,6 ц/га, ячменю — 73,9 ц/га, а рапсу — 51,1 ц/га.
— Усе набыткі, паказчыкі — гэта не проста лічбы, а вынік супольнай працы, — зазначае кіраўнік гаспадаркі. — За кожным цэнтнерам збожжа стаяць штодзённыя намаганні дзясяткаў людзей, іх паўсядзённая руплівая праца, агульныя мэты і памкненні. Менавіта людзі, працаўнікі — наша галоўная каштоўнасць. На іх дабрабыт і стварэнне камфортных умоў для працы скіраваны многія нашы намаганні. Так, напрыклад, мы пашыраем жыллёвы фонд, будуем кватэры для нашых работнікаў. Маладым спецыялістам прапануем пражыванне ў інтэрнаце. Дарэчы, падчас раённых Дажынак у аграгарадку Высокая Ліпа будзе ўрачыста адкрыты шасцікватэрны дом.
Складнікі шчасця
Больш за 20 гадоў працуе ў гаспадарцы брыгадзір паляводчай брыгады Ірына Карпач.
— У маладосці я і не думала аб тым, што звяжу жыццё з сельскай гаспадаркай, — расказвае Ірына Адольфаўна. — Але лёс склаўся інакш, аб чым я не пашкадавала ні дня. Па сутнасці, я да глыбіні душы вясковы чалавек, уся сялянская праца знаёма мне з дзяцінства. Я нарадзілася і вырасла ў гэтай мясцовасці, і тое, што я працую на роднай зямлі, мяне вельмі натхняе, надае сіл. Безумоўна, у сельскагаспадарчай працы няма перапынкаў, і час ляціць вельмі хутка: здаецца, толькі скончылася вясенняя сяўба — ужо прыйшоў час жніва… І так круглы год. Ведаеце, многія падумаюць, што такая аднастайнасць можа надакучыць, але гэта не мой выпадак. У вёсцы не засумуеш!
Нездарма кажуць, што ў сельскай гаспадарцы дзень год корміць. Аб усіх нюансах палявых работ Ірына Адольфаўна ведае дакладна.
— Я ведаю ўсе палеткі нашай гаспадаркі, іх асаблівасці, урадлівасць глебы, — разважае брыгадзір. — Безумоўна, галоўныя задачы ставіць аграном. Менавіта ад яго зыходзяць тыя ці іншыя даручэнні. Мая задача — дакладна, пэўна і якасна іх рэалізаваць. Азіраючыся назад, часам задумваюся: а калі б выбрала іншую прафесію? Ці было б маё жыццё напоўнена такім сэнсам? І думаць не хачу, што магло б быць інакш: я люблю сваю працу, сваю зямлю, кожны яе куточак, люблю лю- дзей, якія працуюць побач са мной. І гэта таксама вялікі складнік майго асабістага шчасця!
Сакрэты паспяховай дзейнасці
Да выбару прафесіі галоўны аграном Аляксандр Іванавіч Антончык падышоў з усёй адказнасцю. З дзяцінства ён ведаў, што хоча працаваць на карысць людзям. У 2017 годзе скончыў Гродзенскі дзяржаўны аграрны ўніверсітэт па спецыяльнасці «Ахова раслін і каранцін». Па размеркаванні ён трапіў у Нясвіжскі раён і сваю працоўную дзейнасць пачаў у ААТ «Гарадзея», праз два гады ўладкаваўся ў ААТ «17 Верасня».
— Дысцыплінаванасць і выдатнае веданне сваёй справы — асноўныя складнікі паспяховай дзейнасці агранома, — лічыць Аляксандр Іванавіч. — Трывалыя веды ў галіне апрацоўкі глебы, унясення ўгнаенняў, падбору насення — вельмі важныя паказчыкі. На жаль, не ўсё залежыць ад чалавека, якім бы прафесіяналам ён ні быў. Трэба ўлічваць яшчэ і характарыстыкі глебы, кліматычныя ўмовы, надвор’е.
Агранамія — амаль што адзіная сфера дзейнасці, у якой хімія, біялогія, фізіка і механіка спалучаны ў аднолькавай ступені. А кожны дзень агранома — пошук новых эфектыўных шляхоў вырашэння пэўных задач, адна з якіх — павышэнне ўраджайнасці.
— Работа над павышэннем ураджайнасці ў нашай гаспадарцы вядзецца бесперапынна, — расказвае А.І. Антончык. — Змяняюцца тэхналогіі апрацоўкі глебы, падбіраюцца правільныя прэпараты, карэкціруецца склад і парадак унясення ўгнаенняў. Істотным з’яўляецца таксама і пашырэнне выкарыстання арганічных угнаенняў. Усё гэта дазваляе істотна павысіць нашы якасныя паказчыкі па многіх сельскагаспадарчых культурах, дабіцца станоўчых вынікаў.
Практычны падыход
Павел Дзмітрыевіч Ярашэвіч скончыў Беларускі дзяржаўны аграрна-тэхнічны ўніверсітэт у 2017 годзе. Сваю прафесійную дзейнасць пачаў у СВК «Агракамбінат Сноў», з лютага 2020 года займае пасаду галоўнага інжынера ў ААТ «17 Верасня».
— Здаецца, галоўным інжынерам я працую адносна нядаўна, — дзеліцца Павел Дзмітрыевіч. — Але і за гэты кароткі час многае змянілася з тэхнічнага пункту гледжання. Штогод з’яўляецца новая тэхніка, удасканальваецца. Трэба паспяваць за гэтымі зменамі, цікавіцца, назіраць за тым, як працуюць іншыя, пераймаць вопыт — інакш нельга. Да ўсякай задачы трэба падыходзіць з практычнага пункту гледжання.
Адным са складнікаў паспяховай дзейнасці прадпрыемства Павел Дзмітрыевіч бачыць своечасовае папаўненне парка сельска- гаспадарчай тэхнікі.
— Мы актыўна закупляем новыя агрэгаты, — расказвае галоўны інжынер. — набываем у асноўным энерганасычаныя трактары, шыроказахопныя сеялкі, граблі, касілкі. У мінулым годзе, напрыклад, купілі камбайн КЗС-2124, трактар МТЗ-1523, два — МТЗ-3522, кормаўборачны камбайн, рулонны прэс-падборшчык, шыроказахопны культыватар, касілку, сеялку, апырсквальнік і іншую сельгастэхніку. Купіць штосьці новае — адна справа, трэба ж яшчэ і пра ўжо набытае клапаціцца: своечасова абслугоўваць тэхніку, падбіраць якасныя дэталі для рамонту, з розумам і адказнасцю ставіцца да яе падрыхтоўкі да сельгасработ.
Ірына ЕФІШОВА.
Фота Ірыны ЛУЧЫНОВІЧ.
