Неонила ЛЮБАНЕЦ Працаваць у сельскай гаспадарцы — значыць аддаваць зямлі цяпло сваіх рук, клапаціцца пра яе, укладваць душу і талент у справу, якая стала сэнсам жыцця. Такіх людзей у нас у раёне нямала, яны — наш гонар. Менавіта такімі стараннымі працаўнікамі багатае і ААТ “Нясвіжскія Астроўкі”.
Як адзначылі ў гаспадарцы, сёлетнія ўмовы надвор’я паспрыялі для атрымання добрых вынікаў. А калі дадаць да гэтага адладжаную тэхналогію, якасныя сарты і руплівую працу кожнага — разумееш, чаму па некаторых культурах “Астроўкі” атрымалі рэкордныя паказчыкі.
Дырэктар прадпрыемства Васіль Халопіца паведаміў, што сёлета клін збожжавых культур склаў 2665 га. Паралельна аграрыі ўбіралі і азімы рапс, пад які ў гаспадарцы было адведзена 385 га. Акцэнт быў зроблены на азімыя культуры. Пшаніцу ўбралі з плошчы ў 1285 га, трыцікале — з 515 га, а ячмень — з 500 га.
— У гэтым годзе сабраны ўра- джай нас асабліва парадаваў, — адзначыў Васіль Мікалаевіч. — Хапіла вільгаці, каб наліліся каласы, так што па многіх культурах у нас рэкордныя лічбы за гісторыю гаспадаркі. Мы атрымалі 21399 тон збожжа, ураджайнасць якога склала 80,3 ц/га. Як ніколі высокая ўраджайнасць рапсу — 56,1 ц/га і азімай трыцікале — 92,5 ц/га. У этым сезоне ўпершыню рапс быў атрыманы і з палёў былога ААТ “Гарадзея”. Выхад культуры на іх не меншы, чым на нашых іншых палях.
Навукова абгрунтаваная структура пасяўных плошчаў, сучасныя перспектыўныя вільгаце- і рэсурсазберагальныя тэхналогіі вырошч- вання — усё гэта дае магчымасць дабівацца добрых ураджаяў. Таму, як лічыць дырэктар сельгаспрадпрыемства, пры граматным падыходзе добры вынік можна атрымаць ад кожнай культуры.
Сёння вырошчванне азімага ячменю — гэта частка звычайнага кругазвароту работ, але яшчэ ў 2017 годзе гэта было чымсьці новым. Прычым у “Астроўках” да сяўбы гэтай культуры прыступілі аднымі з першых у раёне. Пачыналі тады з 15 га. Закупілі элітныя гатункі, выбралі поле, ужылі ўсе свае агранамічныя веды і ў выніку атрымалі небывалы ўраджай. Пасля, з кожным годам, павялічвалі плошчы пасеваў. Сёння яны дасягнулі 500 га, а ўраджайнасць — 73,8 ц/га.
Па выкананні дзяржаўнага заказу сельгаспрадпрыемства перавыканала план. Адвезена 2650 тон пшаніцы, 230 тон рапсу і 450 замест 320-і тон піваварнага ячменю. Можна ўявіць, наколькі большую аддачу далі палі, чым чакалася.
Сёння ААТ “Нясвіжскія Астроўкі” — адна з перадавых гаспадарак раёна. І складана паверыць, што яшчэ гадоў дваццаць таму калгас імя Дзяржынскага (так раней называлася гаспадарка) займаў апошнія пазіцыі ў рэйтынгавай табліцы раёна. І толькі пачынаючы з 2003 года пад кіраўніцтвам Людмілы Гутнік паступова пачаў набіраць абароты і дабівацца вынікаў. Васіль Мікалаевіч змяніў Людмілу Георгіеўну на пасадзе кіраўніка гаспадаркі ў 2017 годзе.
— Мы працягнулі працаваць над павышэннем культуры земляробства, удасканаленнем тэхналогій вырошчвання збожжа і прыйшлі да таго выніку, які маем сёння, — падкрэслівае дырэктар таварыства.
Сапраўды, вынік гэтага года перасягнуў і па валавым намалоце, і па ўраджайнасці нядрэнныя паказчыкі.
— Галоўная і вырашальная частка агратэхнічнага працэсу — зла- джаная работа ўсяго калектыву. Ён працуе як адзіны механізм. Кожны накіраваны на вынік, — падзяліўся сваімі меркаваннямі Васіль Мікалаевіч.
На ўборцы збожжавых, збожжабабовых культур і алейнага насення рапсу ў гаспадарцы працавала 13 камбайнавых экіпажаў. Найбольш прадукцыйна на магутнай сучаснай тэхніцы — камбайнеры Юрый Манулік, Аляксандр Сукала, Максім Лыч, Андрэй Баран, Арцём Мацавіла, Дзмітрый Шмат і Віктар Люмін.
Усе яны — лепшыя ў сваёй справе, а пецярым з іх — Юрыю Мануліку, Аляксандру Сукалу, Максіму Лычу, Андрэю Барану і Дзімтрыю Шмату — пакарыліся дзве тысячы тон збожжа.
На збожжасушыльныя комплексы зерне дастаўляла 21 машына. Больш за ўсё збожжа гэтай адказнай парой перавезлі Дзмітрый Рэбянок, Яўген Чэкан, Віталь Куган, Дзмітрый Магільніцкі і Дзяніс Абрамовіч. Увогуле, кожны вадзіцель перавёз не менш за тысячу тон збожжа.
У полі ў гарачую пару рупліва працуюць усе. Асабіста кантралюе ход уборачных работ і кіраўнік гаспадаркі.
— Кожны з нашых працаўнікоў разумее, што ўборачная — гэта вынік гадавой працы ўсяго калектыву, і кожны хоча ўнесці свой уклад, — дзеліцца настроем у дзень нашага прыезду Васіль Мікалаевіч. — Нягледзячы на стомленасць, хлебаробы працуюць на агульны вынік, не пакладаючы рук.
Героямі жніва прынята лічыць камбайнераў, але ж не меншы ўклад у агульную справу ўносяць і спецыялісты гаспадаркі. Васіль Мікалаевіч характарызуе свой калектыў як граматны, зладжаны і перспектыўны. У асноўным, усе спецыялісты вопытныя, працуюць не першы год. Як, напрыклад, намеснік дырэктара па раслінаводстве Аляксей Грох, які прыйшоў у гаспадарку ў 2004 годзе маладым спецыялістам і застаўся тут. Дарэчы, як адзначае Васіль Мікалаевіч, моладзь, якая прыходзіць у гаспадарку, таксама радуе — перспектыўная.
Падводзячы вынік, варта сказаць, што прынцып работы хлебароба тут непарушны: як бы цяжка ні было, галоўнае адно — вырасціць хлеб і ўбраць атрыманы ўраджай без страт, для чаго хлебаробы ААТ “Нясвіжскія Астроўкі” працуюць самааддана і ўмела.
Неаніла
ЛЮБАНЕЦ.
