Нясвіжскія навіны Не з першага разу маладому несвіжаніну Валерыю Чучману пашанцавала стаць удзельнікам міжнароднага вакальнага конкурсу на “Славянскім базары ў Віцебску”. Тры гады таму ён ужо спрабаваў свае сілы, але адборачны тур выйграць не ўдалося. Аднак надзея не пакідала хлопца, і не дарма — ён не толькі выступіў на легендарнай сцэне Летняга амфітэатра ў Віцебску, прадстаўляючы Беларусь, але і стаў уладальнікам трэцяй прэміі.
25-гадовы Валерый Чучман з дзяцінства быў удзельнікам гарадскіх, раённых і рэспубліканскіх конкурсаў і фестываляў. Скончыў аддзяленне народнай творчасці (харавая музыка) Мінскага дзяржаўнага каледжа мастацтваў.
Песні патрыятычнай тэматыкі, сучаснай эстрады, творы замежнай класікі — такі выканальніцкі рэпертуар маладога спевака.
Таленавітаму несвіжаніну спадарожнічае поспех у многіх творчых праектах. У скарбонцы Валерыя дыпломы I рэспубліканскага творчага конкурсу “Вытокі” ў намінацыі “Вакал” і конкурсу патрыятычнай песні “Песні юнацтва нашых бацькоў”, акрамя гэтага, ён лаўрэат ІІ ступені абласнога конкурсу эстраднай песні “Вясновыя рытмы”.
Падчас праходжання воінскай службы ён з’яўляўся ўдзельнікам канцэртнай групы ВПС і войскаў СПА, затым — салістам нясвіжскага народнага ансамбля песні “Млечны шлях”. Бліжэйшыя планы маладога нясвіжаніна — стаць вакалістам ансамбля “Харошкі”.
Дарэчы, славянскі хіт на сцэне амфітэатра малады артыст пра- спяваў у суправаджэнні Прэзідэнцкага аркестра Рэспублікі Беларусь пад кіраўніцтвам Віталя Кульбакова. Адчуваць адзін аднаго з аркестрам Валерыю якраз і дапамог досвед выступу ў складзе вайсковага ансамбля.
Рэпутацыя міжнароднага фестывалю мастацтваў да многага абавязвае канкурсантаў. Даведаліся ў Валерыя, з якімі пачуццямі ён ехаў у Віцебск.
— Вельмі баяўся падвесці краіну. Разумеў, што трэба трымаць планку, зададзеную маімі папярэднікамі — беларускімі ўдзельнікамі ранейшых гадоў. Безумоўна, хацелася не толькі пакарыць журы, стаць лаўрэатам, але і атрымаць зваротную сувязь ад гледачоў.
— Калі хваляванні засталіся ў мінулым, якія зараз эмоцыі цябе перапаўняюць?
— “Славянскі базар” пашырыў мае межы: пазнаёміў з выдатнымі людзьмі, рознымі краінамі, нават мову замежную атрымалася падвучыць, — усміхаючыся расказвае беларускі спявак.
— Як выбар упаў на песню «Купала — зорка Беларусі»?
— Мне яе параіў аўтар Валерый Шмат, заслужаны артыст Рэспублікі Беларусь, заснавальнік арт-групы “Беларусы”, з якім я супрацоўнічаю ў вакальных праектах. А тым больш я яе і раней выконваў.
— Калі параўноўваць два тваіх выступы, у якім ты спадабаўся сабе больш?
— Думаю, у другі дзень я адчуваў сябе больш упэўнена, бо ў першым туры ўжо паспрабаваў сцэну. Ды і канцэпцыя першай кампазіцыі абавязвала выйсці на сцэну мужным і крыху строгім, а ўжо выкананне сусветнага хіта меркавала быць у вобразе рамантычнага хлопца, які спявае пра каханне. Нагадаем, на суд міжнароднага журы ў якасці сусветнага хіта прадстаўнік Беларусі прадставіў кампазіцыю на італьянскай мове — Caruso.
Так, беларус з Нясвіжа Валерый Чучман заваяваў дыплом трэцяй ступені на конкурсе выканаўцаў “Славянскага базару”. Акрамя таго, спецпрызы Парламенцкага сходу Саюза Беларусі і Расіі ўручылі Валерыю ад Расійскай Федэрацыі, а ад Беларусі — расіянцы Кацярыне Кузінай.
Святлана
РЫЖАКОВА-ЛУЦЭВІЧ.
