Нясвіжскія навіны Наш горад наведваюць шматлікія турысты з розных краін садружнасці і не толькі. На алеях парка можна пачуць англійскую, кітайскую, рускую і іншыя мовы. Прыемна, што Нясвіж папулярны і славіцца сваёй гісторыяй ды архітэктурнымі збудаваннямі. Неяк я сядзела на лаўцы каля парка, а ля бюстаў знакамітых несвіжан розных эпох стаяла вялікая група прыезджых і слухала экскурсавода. Ад іх аддзялілася жанчына і прысела ля мяне, перш папрасіўшы дазволу. Яна спытала, як тут жывецца, я сказала, што ўсё добра. Жанчына сказала:
— У мяне змянілася ўражанне пра вашу краіну.
— А якое было? — пытаюся.
— Я думала, што ў вас толькі бульба.
Я засмяялася і адказала, што бульба, вядома, ёсць. Але, акрамя яе, у магазінах шэраг разнастайных тавараў і ўсё неабходнае. У многіх крамах можна купіць тавары ад чырвонай ікры да мяса-малочнай прадукцыі, выпіць кавы розных гатункаў і закусіць свежай выпечкай. Нават у газетным кіёску можна зрабіць колькі глыткоў кавы, а ў магазіне “Еўраопт” таксама ўстаноўлена кавамашына. Турыстка паведаміла, што ў нас ёй спадабалася, бо ўсё культурна, прыгожа, спакойна. Спытала пра маю пенсію, я не стала адмаўляцца і назвала суму. Яна, а прыехала турыстка з Дамадзедава, здзівілася:
— О, дык на нашы грошы ў Вас дастойная. Я растлумачыла, што па рашэнні нашага ўрада пенсіянерам у 75, 80 і гэтак далей гадоў даецца добрая прыбаўка.
Другі раз я пагаварыла яшчэ з адной турысткай. Яна таксама была прыемна здзіўлена ўбачаным у нас і выказалася так:
— Як тут усё дагледжана, акуратна і прыгожа, беларусы ветлівыя, усё раскажуць і пакажуць. Вы шчаслівыя людзі, што жывяце тут.
Не больш і не менш. Сапраўды, каб быць шчаслівым, не так і многа трэба. Галоўнае — мір, дастойная зарплата і пенсія, ну, і, вядома, здароўе. А людзі ў нас працавітыя, таму ў горадзе чыста, абнаўляюцца вуліцы і скверы. Несвіжане бачылі ўжо, як змянілася тэрыторыя каля касцёла. Новая плітка, акуратныя дарожкі, новыя ліхтары і маладыя дрэўцы, на пастаменце стаіць умоўны раяль. Будзе яшчэ больш прэзентабельна выглядаць касцёл, калі завяршыцца яго рэстаўрацыя. Словам, можам ганарыцца, што жывём у цудоўным горадзе і цывілізаванай краіне.
Раіса ХВІР,
г. Нясвіж.
