Нясвіжскія навіны У Мінску прайшоў VII Міжнародны конкурс выканальніцкіх відаў мастацтваў “#СЯБРЫ-2024”, у якім годна праявілі свае таленты ўдзельнікі ўзорнага тэатральнага калектыву “Раптам” Нясвіжскай дзіцячай школы мастацтваў. Калектыў быў удастоены Гран-пры ў намінацыі “Тэатральная творчасць”!
Сваімі ўражаннямі і далейшымі планамі з карэспандэнтам “НН” падзялілася пастаноўшчык выступлення Валянціна Штоп.
— На гэты конкурс мы падрыхтавалі музычна-літаратурную кампазіцыю “Шлях да дому”, — распавядае Валянціна. — Гэтая пастаноўка новая, і на сцэне конкурсу мы яе паказвалі упершыню. Прычым выступалі самым шматлікім складам за апошні час — дзесяць навучэнцаў ад другога да чацвёртага класа тэатральнага аддзялення Нясвіжскай дзіцячай школы мастацтваў. Усе гэтыя дзеці — моцныя артысты, і я ганаруся, што магу з імі працаваць і як пастаноўшчых, і як часовы кіраўнік. Для мяне велізарная адказнасць захаваць статус калектыву.
Як патлумачыла Валянціна Штоп, калектыў нясвіжскіх артыстаў ужо быў сабраны яго першапачатковым кіраўніком Ганнай Татур, якая цяпер знаходзіцца ў водпуску па доглядзе дзіцяці, але хутка ўжо вернецца ў склад каманды.
— Музычна-літаратурная кампазіцыя “Шлях да дому” — гэта конкурсны варыянт пастаноўкі, але яна будзе пашырацца да вялікага тэатральнага праекта, — адзначае кіраўнік калектыву. — Мы плануем паглыбіць тэму дома, Радзімы і тых сакральных каштоўнасцяў, якія трэба выхоўваць у дзецях. Для гэтага бу- дзем пашырыць склад выступоўцаў.
У ходзе нашай гутаркі Валянціна выказала падзяку за садзейнічанне ў арганізацыі ўдзелу ў конкурсе старшыні Нясвіжскага раённага Савета дэпутатаў Святлане Антончык і дырэктару ААТ “Грыцкевічы” Яўгену Здановічу.
— Дзякуючы ім мы змаглі трапіць на конкурс, — тлумачыць мая суразмоўца. — Так склаліся абставіны, што не было транспарту, а нас шмат, ды яшчэ і касцюмы з сабой… Але дзякуючы Святлане Антонаўне і Яўгену Уладзіміравічу мы змаглі здзейсніць свае мары і годна прадставіць Нясвіж.
— За гэты год мы атрымалі немалую колькасць узнагарод. Першыя дыпломы лаўрэатаў ІІ і ІІІ ступеняў былі ў 2023 годзе. А ўжо сёлета, адчуўшы сябе больш упэўнена, пачалі ездзіць на больш масшабныя конкурсы. Двойчы ўжо сталі лаўрэатамі І ступені, і цяпер — гран-пры. Мы не забываем і пра раённыя конкурсы. Удзельнікі пастаноўкі “Шлях да дому” праявяць сябе як сола-артысты ў конкурсе чытальнікаў і выступяць на розных гарадскіх пляцоўках. Мы стараемся выступаць як мага больш, бо сцэнічны вопыт надае дзецям больш упэўненасці ў сабе. І самае галоўнае: паказвае і юным тэатралам, і іх бацькам, што акцёрскае майстэрства — гэта вялікая праца. У першую чаргу — над сабой. Мы стараемся надаваць як мага больш увагі развіццю патэнцыялу дзяцей. Тым больш у год якасці для нас гэта асабліва актуальна.
Наперадзе ў студыі завочны ўдзел у міжнародным конкурсе “Тhe V International multi-genre contest» LetoStar-2024” і мноства іншых творчых праектаў.
— Мы хочам папулярызаваць тэатральную творчасць. Актыўна вядзем сваю старонку ў Instagram, каб пазначыць, што ў нашым гора-дзе ёсць такая прастора, дзе дзеці могуць развіваць свае акцёрскія таленты. Фіксуем у сацыяльнай сетцы ўсе выступленні, перамогі, узнагароды. Наперадзе ў нас шмат працы, і гэта толькі матывуе рабіць сваю справу як мага лепш. Мы бу- дзем і далей працаваць над тым, каб выходзіць на новыя ўзроўні.
Што ж, віншуем артыстаў і жадаем ім далейшых поспехаў!
Неаніла ЛЮБАНЕЦ.
