Нясвіжскія навіны На мінулым тыдні ў Нясвіжскім раёне пачалася нарыхтоўка кармоў. Травы першага ўкосу трэба паспець скасіць у аптымальныя тэрміны, каб кармы атрымаліся як мага больш пажыўнымі — гэта аграрыі ведаюць напэўна.
І хоць у цэлым працэс падобны, у кожнай гаспадарцы свае тонкасці. І каб даведацца, як функцыянуе “зялёны канвеер” у розных сельгасарганізацыях раёна, карэспандэнт “НН” пабывала ў двух з іх.
Касіць травы першага ўкосу аграрыі ААТ “НОВАЕ ЖЫЦЦЁ” пачалі ўжо ў панядзелак, 13 мая, — аднымі з першых у раёне.
— Мы пачалі корманарыхтоўку з участкаў, на якіх былі пасеяны злакавыя травы, — распавёў карэспандэнту галоўны эканаміст гаспадаркі Сяргей Антанюк — Летась за май мы нарыхтавалі 4,5 тысячы тон, сёлета да канца мая плануем закласці ў траншэі не менш за 4,7 тысячы тон. Усе травы гэтага ўкосу закладуць аснову кармавой базы на зімовы перыяд. Хоць з году ў год мы папаўняем пагалоўе буйной рагатай жывёлы, кармоў, як і раней, хапае з лішкам. Бо паралельна з ростам пагалоўя мы павялічваем і кармавую базу. У гэтым годзе плануем завяршыць уборку траў першага укосу ў пачатку чэрвеня.
Вынік нарыхтоўкі шмат у чым вызначыць прадуктыўнасць малочнага статка, яго здароўе і захаванасць. Таму кожны імкнецца выканаць сваю працу, як мага лепш.
Размаўляючы з работнікамі гаспадаркі, разумееш, наколькі працэс нарыхтоўкі кармоў тут старанна спланаваны. Укараняюцца новыя сучасныя падыходы, закупляецца новая магутная тэхніка. Свой уклад уносяць і работнікі — як спецыялісты, так і механізатары, ва- дзіцелі, якія праводзяць усе віды работ хутка і якасна.
На магутных энерганасычаных трактарах косяць травы Віктар Буйко, Сяргей Кандрацюк, Аляксандр Пабу-дзей, Аляксей Гайцюкевіч і Дзмітрый Смірноў. Следам за імі баразняць палі на камбайнах-падборшчыках Іван Акулік і Віктар Карачун. Гэтыя ўмелыя механізатары працуюць з агрэгатамі КВК-8060 і КВК-800. А руль новага кормаўборачнага “Нью Холанда” давераны маладому механізатару Іллі Стрэльчыку, які добра сябе зарэкамендаваў. Пяць работнікаў задзейнічаны на варушэнні, правяльванні травяной масы. Гэта — Станіслаў Бандзік, Віктар Баргулёў, Мікалай Акулік, Аляксандр Смірноў і Сяргей Дуброва.
Зялёную масу з поля возяць не толькі вадзіцелі, але і трактарысты. Сярод іх — Аляксандр Надольскі, Алег Яраш і Яўген Кораб. А грузавымі машынамі на адвозцы кіруюць Аляксей Яўстрат, Анатолій Тамашэвіч і Сяргей Смірноў. Не забудзем і пра тых, хто працуе на трамбоўцы масы ўжо на сянажнай траншэі — гэта Віктар Аніскаўцоў, Юрый Ханцэвіч і Віктар Гаціла.
Корманарыхтоўшчыкі “НОВАГА ЖЫЦЦЯ” працы не баяцца, ставяцца да яе адказна, імкнуцца ўсё рабіць сумленна. Бо ведаюць, што ад кожнага з іх залежыць, наколькі будзе сытай зімой жывёла гаспадаркі. А такім чынам — які будзе прыбытак сельгаспрадпрыемства і заробак кожнага з іх.
Неаніла ЛЮБАНЕЦ.
