Нясвіжскія навіны Установа адукацыі “Нясвіжскі дзяржаўны каледж імя Якуба Коласа” — адна з вядучых устаноў сярэдняй спецыяльнай адукацыі педагагічнага профілю Рэспублікі Беларусь — сёлета адзначыць свой 40-гадовы юбілей.
Установа рэалізуе адукацыйныя праграмы сярэдняй спецыяльнай адукацыі па спецыяльнасцях “Дашкольная адукацыя”, “Пачатковая адукацыя”, “Замежная мова”, “Фізічная культура”, “Дызайн (графічны)” і ажыццяўляе падрыхтоўку кадраў для ўстаноў адукацыі і культуры Мінскай вобласці. Каля 10 гадоў тут вялася і падрыхтоўка спецыялістаў з кваліфікацыяй “Турагент-экскурсавод”.
Як адзначыла ў нашай гутарцы дырэктар установы Алена Жураўлёва, з гэтага года — член Савета рэспублікі Нацыянальнага сходу рэспублікі Беларусь, — педагагічны калектыў каледжа, новы летапіс якога пачаўся ў 1984 годзе, працягвае традыцыі пасляваеннага Нясвіжскага педагагічнага вучылішча, якое працавала з 1944-га па 1956 год, шануе і захоўвае духоўную і педагагічную спадчыну Нясвіжскай настаўніцкай семінарыі, што дзейнічала ў 1875 — 1918 гадах. За сваю амаль саракагадовую гісторыю развіцця гэта навучальная ўстанова падрыхтавала і выпусціла 5 тысяч кваліфікаваных спецыялістаў: настаўнікаў, выхавальнікаў, дызайнераў, турагентаў-экскурсаводаў.
Гонар каледжа — музей
Багатая гісторыя развіцця педагагічнай адукацыі ў г. Нясвіжы стала змястоўнай асновай музея, створанага калектывам каледжа ў 2012-2017 гадах. Паколькі ўстанова адукацыі размяшчаецца ў помніку архітэктуры XVI — XVIII стагоддзяў — комплексе манастыра бенедыктынак, каледжам вядзецца вялікая праца па захаванні культурнай спадчыны, яе прэзентацыі і папулярызацыі. Частка экспазіцыі музея і ландшафтных тэматычных кропак на тэрыторыі ўстановы прысвечана класіку беларускай літаратуры, выпускніку Нясвіжскай настаўніцкай семінарыі Якубу Коласу, чыё імя сёння і носіць каледж. У фармаце творча-пошукавага праекта штогод у дзень нараджэння Якуба Коласа праводзіцца свята “Каласавіны”.
Залог поспеху — добрыя педагогі
У каледжы працуюць высокакваліфікаваныя спецыялісты, з іх каля 90% — першай і вышэйшай кваліфікацыйных катэгорый, 7 педагогаў маюць акадэмічную ступень магістра, 16 адзначаны знакам “Выдатнік адукацыі”. Асаблівы падыход у адборы педагагічных кадраў, якія павінны стаць “настаўнікамі настаўнікаў”, заклаў яшчэ першы дырэктар каледжа Валянцін Захаравіч Бруй. Яго дзелавую хватку ў свой час пераняў Віталь Канстанцінавіч Раманчук, які ўзначальваў установу з 1998 па 2010 год. Высокі прафесіяналізм, актыўная грамадзянская пазіцыя, нястомная працавітасць адрознівалі тых, хто з першых дзён працаваў і ствараў славу гэтай установы адукацыі. Гэта і пакаленне педагогаў і работнікаў, якое пайшло з жыцця — М.І. Антульская, М.В. Бенедзіктовіч, В.М. Бруй, Р.М. і Л.А. Бухорскія, В.Б. Вярыга, П.А. Гапановіч, А.В. Грабёнка, Ю.М. Далмат, Т.У. Жалняркевіч, С.П. Кандыбовіч, А.Л. Катовіч, У.А. Махалік, У.Я. Мяркулаў, Л.М. Павукова, Т.Ф. Плюцінская, Н.А. Саўчанка, Я.А. Саковіч, В.І. Ша-роў, В.В. Шокшынскі. Гэта ветэраны працы і вопытнейшыя выкладчыкі і работнікі каледжа — Г.І. Абрамовіч, Ч.К. Азарка, Т.А. Аксёнік, А.М. Бясько, Т.В. Вярыга, Л.В. Ганчарык, А.М. Глобаж, Т.І. Гуцановіч, М.Ф. Енчык, Л.Ю. Жыгунова, А.С. Жураўская, Я.В. Захватка, Ю.В. Зізіка, Л.К. Карпач, А.В. Корсак, Г.П. Калеснікевіч, А.М. Ладзята, М.М. Лявіцкі, Л.М. Луцэвіч, А.А. Мацэль, А.І. Нявяроўская, Ж.Г. Радчанка, А.В. Раманчук, З.К. Сасім, Л.У. Сівуха, Т.І. Сяліцкая, В.А. Случак, Л.А. Станкуць, Л.С. Стэфанкова, Г.І. і У.Я. Сухавей, І.Я. Тронцаў, В.М. Усава, І.У. Хацько, А.Д. Чадовіч, І.А. Чысцякова, Я.І. Цвірка, якія прапрацавалі ва ўстанове больш за трыццаць гадоў.
Пераемнасць традыцый
Стабільнасць вынікаў, пераемнасць традыцый, пазітыўны імідж — тое, што заўсёды адрознівала калектыў установы адукацыі “Нясвіжскі дзяржаўны каледж імя Якуба Коласа” і адзначалася на самым высокім узроўні. У 2018 годзе дырэктару каледжа Алене Васільеўне Жураўлёвай прысвоена ганаровае званне “Заслужаны настаўнік Рэспублікі Беларусь”.
На тэрыторыі каледжа створана сучасная спартыўная прастора: у 2019 годзе адкрыта другое ў рэспубліцы поле для гульні ў міні-гольф, у 2022 годзе пры садзейнічанні Рэспубліканскага дзяржаўна-грамадскага аб’яднання “Прэзідэнцкі спартыўны клуб” — шматфункцыянальны спартыўны комплекс з воркаўт-пляцоўкай, сілавымі трэнажорамі, стрытбольным сектарам.
Каб было цікава вучыцца і развівацца
На развіццё сацыяльна-камунікатыўных кампетэнцый спецыялістаў накіравана дзейнасць шматлікіх аб’яднанняў па інтарэсах, якія функцыянуюць у каледжы. Многія навучэнцы з задавальненнем наведваюць гарадскія гурткі, клубы, секцыі ва ўстановах дадатковай адукацыі, культуры, спорту. Узаемадзеянне з сацыякультурным асяроддзем горада накіравана на грамадзянска-патрыятычнае, духоўна-маральнае, эстэтычнае і творчае развіццё асобы вучня. Пераможца шматлікіх міжнародных інтэлектуальных конкурсаў — навуковае таварыства навучэнцаў “Постижение” — часты госць навуковых канферэнцый, што праходзяць у Нацыянальным гісторыка-культурным музеі-запаведніку “Нясвіж”. Вакальная група “Шанц”, інструментальны ансамбль “Дыліжанс”, фальклорны калектыў “Кола”, лаўрэаты рэспубліканскіх конкурсаў мастацкай творчасці моладзі “Арт-вакацыі”, “Беларускі вянок”, “ПрафАрт” — актыўна супрацоўнічаюць з Нясвіжскім гарадскім маладзёжным цэнтрам. Навучэнцы спецыяльнасці “Дызайн”, пераможцы рэспубліканскіх конкурсаў мастацкай і тэхнічнай творчасці “АртНавацыя”, “Тэхна-інтэлект”, “ТэхнаЁлка” ўзаемадзейнічаюць з навучэнцамі і педагогамі мастацкага аддзялення Нясвіжскай дзіцячай школы мастацтваў. Навучэнцы-дызайнеры ствараюць лагатыпы, дызайн-праекты краязнаўчай накіраванасці, сувенірную прадукцыю, іх сіламі вядзецца пастаяннае абнаўленне экспазіцыі музея ўстановы адукацыі і эстэтызацыя адукацыйнай прасторы каледжа.
Створаны ў 2006 годзе мужчынскі інструментальны ансамбль “Нясвіжскія лыжкары” (кіраўнік Уладзімір Сухавей) у 2009 годзе быў удастоены звання “народны” як калектыў Нясвіжскага раённага цэнтра культуры. У гэтым калектыве змянілася некалькі пакаленняў выканаўцаў, але яго пазнавальнасць і папулярнасць у нашай краіне і за мяжой толькі расце. У 2019 годзе за значны ўклад у папулярызацыю музычнага мастацтва, мэтанакіраваную работу па эстэтычным выхаванні падрастаючага пакалення, актыўную канцэртную дзейнасць народны інструментальны ансамбль “Нясвіжскія лыжкары” стаў уладальнікам Спецыяльнай прэміі Прэзідэнта Рэспублікі Беларусь дзеячам культуры. Больш за 15 гадоў калектыў з’яўляецца свое- асаблівым брэндам як установы адукацыі, так і рэгіёна.
Конкурсы і праекты
Ва ўстанове створаны пярвічныя арганізацыі Беларускага прафсаюза работнікаў адукацыі і навукі, Беларускага рэспубліканскага саюза моладзі. Першасныя арганізацыі — удзельнікі і прызёры такіх рэспубліканскіх галіновых конкурсаў і фестываляў, як “Новыя імёны Беларусі”, “100 ідэй для Беларусі”, “Судэнты. Бяспека. Будучыня”. Валанцёрскі атрад каледжа “Эра міласэрнасці” неаднаразова прызнаваўся лепшым у Мінскай вобласці і ў Рэспубліцы Беларусь.
Значная ўвага ў каледжы надаецца другаснай занятасці навучэнцаў і падтрымцы студатрадаўскага руху, які развіваецца з пачатку 2000-х гадоў.
Базамі практычнага навучання з’яўляюцца ўсе ўстановы агульнай сярэдняй і дашкольнай адукацыі горада. Сумесна з дырэктарамі школ, загадчыкамі дзіцячых садоў, прадстаўнікамі ўпраўлення па адукацыі ажыццяўляецца маніторынг якасці падрыхтоўкі спецыялістаў, вядзецца планамерная работа па ўдасканаленні практычнай падрыхтоўкі будучых выпускнікоў. Замацаванню прафесійнай цікавасці навучэнцаў, удасканаленні прафесійных уменняў і навыкаў, развіццю прафесійнага і крэатыўнага мыслення навучэнцаў, фарміраванню вопыту творчай дзейнасці ў прафесійнай сферы садзейнічае і пастаянны ўдзел у рэспубліканскіх конкурсах прафесійнага майстэрства. На базе ўстановы адукацыі праводзіліся асобныя туры конкурсу “WorldSkills Belarus” Мінскай вобласці, а цяпер — чэмпіянату прафесійнага майстэрства навучэнцаў устаноў прафесійнай адукацыі па кампетэнцыях “Пачатковая адукацыя”, “Дашкольная адукацыя” і “Дызайн (графічны)”.
Штогод ва ўстанове рэалізуюцца рэспубліканскія і рэгіянальныя эксперыментальныя і інавацыйныя праекты. А такія інфармацыйныя і творчыя працы каледжа як вэб-рэсурс “Нясвіж.by. Новая гісторыя старога горада”, гарадская азбука “Нясвіжскі лемантарык”, турыстычны адукацыйны марш “Нясвіж. Гасцінны двор”, віртуальная віктарына “Дзіцячая Біблія: чытаем разам” сталі адпраўной кропкай для стварэння рэальных культурных праектаў, якія паспяхова рэалізаваны ў горадзе.
Шырокая прадстаўленасць кале- джа ў сетцы інтэрнэт праз афіцыйны сайт, сацыяльныя сеткі і месэнджары (Укантакце «НГК імя Якуба Коласа», тэлеграм-канал «НГК імя Якуба Коласа», Інстаграм «ngk_nesvizh», YouTube «Відэаканал «Нясвіжскі каледж») узмацняюць імідж навучальнай установы як адукацыйнага асяроддзя, якое ідзе ў нагу з часам.
Добраўпарадкаваная тэрыторыя ўстановы адукацыі, камфортныя ўмовы для навучання і пражывання, сучасныя сродкі навучання, запатрабаванасць выпускнікоў на рынку працы, унікальнае месцазнаходжанне — усё гэта не толькі прадмет гонару для калектыву ўстановы адукацыі, але і складнік іміджу старажытнага і заўсёды маладога Нясвіжа.
Нясвіжскі дзяржаўны каледж імя Якуба Коласа неаднаразова станавіўся лаўрэатам і пераможцам конкурсу “Лепшая ўстанова сярэдняй спецыяльнай адукацыі Мінскай вобласці” і ганарыцца сваімі дасягненнямі, сваім калектывам і сваімі выпускнікамі.
Аб тым, якія мерапрыемствы будуць праходзіць у рамках святкавання 40-годдзя Нясвіжскага дзяржаўнага каледжа імя Якуба Коласа, мы абавязкова раскажам у далейшых нумарах “НН”.
Падрыхтавала
Соф’я ЛЮБАНЕЦ.
