Нясвіжскія навіны Міхаіл Жыгуноў, старшыня Нясвіжскага раённага аб’яднання прафсаюзаў:
— Сёння насельніцтва добра праінфармаванае аб электаральнай кампаніі, яе навінах, перавагах адзінага дня галасавання. Выбары — адна з формаў удзелу грамадзян у кіраванні дзяржавай. Прыняць у іх удзел — гэта наш грама- дзянскі абавязак, адказнасць перад нашымі дзецьмі, бо мы сваімі рукамі будуем той свет, у якім яны будуць жыць і працаваць. Аддаючы голас за таго ці іншага кандыдата, мы робім свой маленькі ўклад у нашу агульную будучыню. Менавіта таму абыякавых быць не павінна.
Як прафсаюзны лідар, нагадаю, што ўдзел у выбарах — гэта наш абавязак і наш прамы інтарэс. І па заканадаўстве, і па існуючай практыцы прафсаюзы — гэта адна з апор грамадзянскай супольнасці. Зыходзячы з гэтага, мы напрамую ўдзельнічаем ва ўсіх працэсах, значных для грамадства. Маючыя адбыцца выбары — адна з такіх найважнейшых кампаній. Ад таго, якім будзе якасны склад мясцовых саветаў, Палаты прадстаўнікоў, шмат у чым залежыць, як мы будзем жыць далей. Таму мы дакладна вызначыліся, што, па-першае, будзем падтрымліваць на маючых адбыцца выбарах тых кандыдатаў, перадвыбарныя праграмы якіх супадаюць з мэтамі і задачамі прафсаюзаў. Гэта найперш тыя кандыдаты, якія будуць у сваіх праграмах вызначаць галоўнымі задачамі развіццё вытворчасцей, працоўных месцаў, рост заработнай платы, павышэнне дабрабыту людзей. Гэта найважнейшыя пытанні, якія ёсць у нашай прафсаюзнай рабоце.
Таксама прафсаюзы вылучаюць сваіх прадстаўнікоў у склад выбарчых камісій і ў нацыянальныя наглядальнікі.
Яшчэ адзін важны момант — ужо ў бліжэйшы час прафсаюзы пачнуць праводзіць пляцоўкі для дыялогу ў працоўных калектывах.
Гэтая форма работы добра сябе зарэкамендавала падчас падрыхтоўкі да рэферэндуму і зараз стане добрай магчымасцю пагутарыць з экспертамі, кандыдатамі ў дэпутаты, разгледзець іх перадвыбарныя праграмы, абмеркаваць электаральную кампанію.
Мы ўсе жадаем, каб мы жылі лепей, каб жылі мірна. І ад таго, як будуць сфарміраваны нашы органы ўлады, наша заканадаўчая ўлада, залежыць вельмі шмат: якасць законаў і вырашэнне пытанняў людзей. Таму калі нехта думае “гэта не маё”, “мая хата з краю”, ён моцна памыляецца. Калі мы хочам далей будаваць нашу краіну, то мы павінны прыйсці на выбары і аддаць свой голас за самых дастойных.
Запісала
Соф’я ЛЮБАНЕЦ.
