Максим ЖУК Як павядамляе БелТА, навукоўцы пасля шматгадовых даследаванняў змаглі высветліць асобы людзей з трох магільняў, якія належалі сям’і Аляксандра Македонскага. Паводле новых звестак, там ляжаць астанкі бацькі, мачахі, зводных братоў і сына Аляксандра, паведамляе «МІР 24». Грабніцы размешчаны ў Вялікім кургане Вергіна на поўначы Грэцыі.
Яны былі знойдзены ў 1977 годзе і ўнесены ў спіс Сусветнай спадчыны ЮНЕСКА. Навукоўцы адзначылі, што ў іх захаваўся «дзіўна багаты» набор пахавальных прылад. Не было сумневаў, што косткі належалі блізкім сваякам Аляксандра. Але каму менавіта — заставалася прадметам спрэчак на працягу амаль паўстагоддзя.
Каб знайсці адказ на гэтае пытанне, вучоныя выкарыстоўвалі некалькі навуковых метадаў. Яны аб’ядналі астэалагічны аналіз (вывучэнне формы і структуры костак), макрафатаграфію, рэнтгенаўскія здымкі і анатамічныя даследаванні, а таксама вывучылі гістарычныя крыніцы.
У грабніцы I знаходзіліся косткі мужчыны з пашкоджаным каленам, а таксама жанчыны і дзіця, якому на момант смерці было ўсяго некалькі дзён ці тыдняў ад роду. Навукоўцы заключылі, што мужчына — бацька Аляксандра Македонскага Філіп II, які пры жыцці кульгаў.
Жанчына з дзіцем — яго жонка і сын. У гістарычных хроніках пазначана, што Філіп быў забіты ў 336 годзе да нашай эры разам з жонкай Клеапатрай і нованароджаным дзіцем. Лічыцца, што злачынства здзейснілі па загадзе папярэдняй жонкі Філіпа Алімпіяды — такім чынам яна імкнулася вызваліць свайму сыну (будучаму Аляксандру Македонскаму) дарогу да трона.
У грабніцы II ляжалі астанкі мужчыны і жанчыны, якая пры жыцці часта ездзіла верхам. На думку навукоўцаў, астанкі належалі зводнаму брату Аляксандра цару Арыдэю і яго жонцы, «жанчыне-ваяру» Адэі Эўрыдыцы. У грабніцы III, па словах даследнікаў, пахаваны Аляксандр IV — сын Македонскага, які памёр падлеткам.
