Нясвіжскія навіны Заўтра, 11 студзеня, мы адзначым Міжнародны дзень “дзякуй”. “Бацькамі” ідэі ўстанавіць такое цудоўнае свята сталі ААН і ЮНЕСКА, якія вырашылі паказаць свету, як важна быць спагадлівым, добрым і ветлівым.
Беларускае слова “дзякуй” мае індаеўрапейскую аснову, бо прыйшло да нас з нямецкай мовы праз польскую (danken — dzięki). Ёсць і такая цікавая версія, што “дзякуй” і “дзякую”пайшло ад старажытнаславянскай назвы бога “Дзіў”, “Діў”, “Дів”, які ў нашых далёкіх продкаў быў богам неба, нябеснага прастору, захавальнікам і апекуном нашага свету. Таму “Дзіўкуй — Дзякуй” — гэта значыць “жыві з богам”, ці “як бог”.
Мы ўжываем гэтае слова паўсядзённа, часам проста аўтаматычна, але заўсёды — для выказвання сваіх станоўчых пачуццяў. Псіхолагі параўноўваюць словы ўдзячнасці па эмоцыях з пачуццямі дзіцяці ад пагладжванняў і пацалунку маці. Шчырая ўдзячнасць прыносіць чалавеку цёплыя адчуванні, радасць і эмацыйны ўздым.
Па правілах этыкету, дзякаваць трэба, гледзячы прама на чалавека. Кантакт “вочы — у вочы” дазваляе персаніфікаваць сказаныя словы. Вымаўляць іх трэба абавязкова са шчырым і добрым пасылам. Але гэта не значыць, што можна прамаўчаць у адказ на дробную дапамогу, калі яна не здаецца вам каштоўнай. Лічыцца, што трэба выхоўваць у сабе пачуццё падзякі за ўсё, што атрымліваеш ад іншых людзей і свету ў цэлым.
Ды і, напэўна, многія з вас успомняць добрыя словы, сказаныя вам хораша і шчыра, якія засталіся ў памяці не толькі на месяцы, але нават і на доўгія гады.
У сучасным грамадстве мы ўсё часцей забываем дзякаваць адзін аднаму, альбо не заўважаем сказаных нам слоў. Разумеючы ўсю важнасць для чалавецтва ў выкананні правіл этыкету, ветлівым звароце адзін да аднаго, у сіле, якую нясе ў сабе “чарадзейнае” слова, і было задумана самае “ветлівае” свята — Міжнародны дзень “дзякуй”.
З кожным годам усё больш краін і людзей далучаецца да святкавання гэтага дня. Моладзь удзельнічае ў конкурсах і флэшмобах, на плакатах і паштоўках пішуць “дзякуй” на розных мовах, абменьваюцца падарункамі, не забываючы дзякаваць адзін аднаму. Ніводны чалавек не застаецца абыякавым. Атмасфера свята і весялосці захоплівае ўсіх. Кожны імкнецца зрабіць нешта добрае не толькі дзеля слоў падзякі, а таму, што гэта прыемна. Бо любы добры ўчынак абавязкова вернецца, а сказанае “дзякуй” зробіць свет крышачку дабрэйшым.
Памятайце, што словы падзякі валодаюць чароўнымі ўласцівасцямі — людзі з іх дапамогай дораць радасць адзін аднаму, выказваюць увагу і перадаюць станоўчыя эмоцыі, тое, без чаго наша жыццё стала б змрочным і бедным. Да таго ж, радасць — гэта пачуццё, якое прама ўплывае на наша самаадчуванне: атрымліваючы словы падзякі, наш арганізм выпрацоўвае гармон аксітацын, які станоўча ўплывае на здароўе і псіхіку чалавека. Таму не шкадуйце добрых і цёплых слоў, падзякуйце ў гэты дзень усім, хто побач з вамі, усім, каго любіце і шануеце.
Вымаўляючы “дзякуй”, вы дзякуйце самому Лёсу, Богу, праймаючы святлом і цеплынёй не толькі таго, да каго звернутыя словы, але і сваю ўласную аўру.
Энергія падзякі — найвялікшая сіла, якая даступная кожнаму. Дастаткова проста дзякаваць блізкім, сябе, жыццю, свету вакол, Сусвету, надвор’ю, прыро- дзе, свайму сэрцу. І абавязкова заўважыце, як усё становіцца лепшым, жыццё — ярчэйшым, а вы — больш радаснымі!
І яшчэ: у падзякі няма тэрміна даўнасці, таму не толькі заўтра, але і ў любы іншы дзень можна патэлефанаваць, напісаць смс або ліст таму, хто калісьці зрабіў вас больш шчаслівым. І вы ўбачыце, што ваша “дзякуй” абавязкова вернецца да вас!
