Нясвіжскія навіны У кожнага з нас год, які толькі што адышоў, пакінуў свае незабыўныя моманты, свае яскравыя ўспаміны. Аб тым, якім ён быў для некаторых з нашых землякоў, мы запыталі ў іх саміх.
Дырэктар УА “Нясвіжскі дзяржаўны каледж імя Якуба Коласа Алена Жураўлёва:
— Год быў цікавы, багаты на знакавыя падзеі. Адна з іх — цэнтралізаваны экзамен для школьнікаў, які ўпершыню прайшоў на базе нашага каледжа. Гэта было вельмі адказна, хвалююча і патрабавала вялікай сістэмнай падрыхтоўкі. Сведчаннем таго, што мы не дарэмна стараліся, стала тое, што ў студзені новага, 2024 года, нам ізноў даверылі правядзенне рэпетыцыйнага экзамена, а ў маі будзе цэнтралізаваны экзамен.
У сакавіку мне пашчасціла асабіста прысутнічаць на сустрэчы, падчас якой Кіраўнік дзяржавы звяртаўся са сваім Пасланнем да беларускага народу. Гэта дапамагло яскрава ўявіць маштаб значымасці Года міру і стваральнай працы для ўсёй нашай краіны.
Яшчэ адзін запамінальны момант 2023-га — удзел нашых рабят разам з выдавецкім домам “СБ” у распрацоўцы лагатыпу, прысвечанага Году міру і стваральнай працы. Нашы пераможцы былі запрошаны ў выдавецкі дом, дзе іх узнагародзілі і правялі экскурсію па музеі Беларускай дзяржаўнасці.
Сёлета наш сэрвісны атрад па суправаджэнні экскурсій у мемарыяльны комплекс “Хатынь” быў прызнаны лепшым атрадам такога прызначэння. У яго на добраахвотных пачатках увайшлі нашы выпускніцы. Яны ўдзельнічалі ў мерапрыемствах на Кургане Славы і ва ўскладаннях кветак разам з Кіраўніком нашай краіны.
Запомнілася нам — і педагогам, і навучэнцам — і сустрэча з кіраўніком Адміністрацыі Прэзідэнта Ігарам Сергіенка, з якім мы гаварылі аб пытаннях маладзёжнай палітыкі.
Яшчэ ў гэтым годзе наш каледж зрабіў вельмі вялікі выпуск навучэнцаў, якія стопрацэнтна былі працаўладкаваны.
Асобна трэба адзначыць, што чэрвень гэтага год стаў для мяне годам дасягнення пенсійнага ўзросту, што таксама з’яўляецца асаблівым этапам у жыцці, часам падвядзення пэўных вынікаў і ўсведамленняў. Аднак доўга рэфлексіраваць на гэту тэму не выпадала — наш каледж актыўна ўдзельнічаў у падрыхтоўцы да 800-годдзя горада. Мы правялі вельмі шмат рамонтных работ: і вучэбны корпус, і помнік архітэктуры — наш фасад — былі добраўпарадкаваны і абноўлены. Нашым своеасаблівым сімвалічным укладам у падрыхтоўку да юбілея Нясвіжа стала і тое, што наша навучэнка ІІІ курса аддзялення дызайну Валянціна Кулеш стала аўтарам лагатыпу да гэтай слаўнай даты. Зараз ён наносіцца на ўсе вырабы, прысвечаныя юбілею горада. Нашы навучэнцы зрабілі многа роспісаў, прысвечаных 800-годдзю горада, асабліва ў дварах па вуліцы Савецкай, а таксама ў дзіцячай кансультацыі новай паліклінікі, дзіцячым аддзяленні ЦРБ, пакоі бяспекі ў ім.
Вельмі дастойна выступіла ў рэспубліканскім конкурсе “Профскілс” наша навучэнка Ксенія Канавалава, якая заваявала прыз глядацкіх сімпатый.
У верасні ў нас прайшлі рэспубліканскія спаборніцтвы па міні-гольфу пад эгідай Рэспубліканскай Федэрацыі гольфа, нашы навучэнцы выдатна паказалі сябе ў рэспубліканскім конкурсе “Студэнт. Бяспека. Будучыня” і ў многіх іншых спаборніцтвах.
Пералік усіх цікавых падзей, якімі жыў наш каледж, зойме вельмі шмат часу, таму ў заключэнне скажу толькі, што 2023 год плаўна перайшоў для нас у юбілейны, 2024-ы, калі мы адзначым 40-годдзе аднаўлення сваёй работы як установы сярэдняй спецыяльнай адукацыі. Таму самыя цікавыя нашы справы — яшчэ наперадзе.
Выкладчык музыкі Аношкаўскай дзіцячай школы мастацтваў, канцэртмайстар узорнага дзіцячага ансамбля гарманістаў “Аношкаўскія музыкі” Арцём ДЗЕРАВЯГА:
— Год выдаўся для мяне вельмі насычаным, таму што трэба было шмат рэалізаваць як у выкладчыцкай, так і ў выканальніцкай дзейнасці. Я прыйшоў на работу ў наш раён пасля заканчэння Беларускага ўніверсітэта культуры і мастацтваў па спецыяльнасці “Інструменты народнага аркестра. Баян” у канцы пазамінулага года. Таму 2023 стаў для мяне годам прафесійнага станаўлення, падчас якога многае хацелася ахапіць. Дзяцей я вучу музыцы ў Грыцкевічах, дзе на базе Грыцкевіцкай сярэдняй школы працуе філіял маёй роднай Аношкаўскай дзіцячай школы мастацтваў, у якой і сам некалі спасцігаў асновы ігры на баяне. Акрамя гэтага, часта выступаю ў канцэртах, прыходзіцца бываць і на міжнародных музычных фестывалях. Разам з мастацкім кіраўніком узорнага дзіцячага ансамб-ля гарманістаў “Аношкаўскія музыкі” Аляксеем Андросікам мы стварылі дуэт баяна і акардэона, у якім на працягу 2023 года выступалі на розных пляцоўках вобласці і раёна. Увогуле ў канцэртным плане год быў вельмі ўдалым: мы шмат дзе выступалі як дуэт, а таксама ў складзе “Аношкаўскіх музык”. Напрыканцы 2023-га пабывалі на міжнародным фестывалі народнай песні і музыкі “Бараньскія музыкі”, што праходзіў пад Оршай. Я ўзяў там першае месца як саліст на народных інструментах, а “Аношкаўскія музыкі” — таксама першае месца як ансамбль. Таксама незабыўныя ўражанні пакінуў наш удзел у міжнародным фестывалі ў Смаленску. Мы выступалі там як запрошаныя атрысты і нават не чакалі такого поспеху. Гэта быў выдатны вопыт, які, безумоўна, пайшоў на карысць нашай далейшай творчай дзейнасці, і мы з яшчэ большым натхненнем працуем над рэпертуарам, над новымі вобразамі.
Адным словам, год выдаўся насычаным, поўным розных ідэй і памкненняў, якія абавязкова будуць увасабляцца ў жыццё ў 2024-м, які ўжо наступіў.
Запісала Соф’я ЛЮБАНЕЦ.
