Шчыруюць з усёй адказнасцю

Падыходзіць да завяршэння сельскагаспадарчы год, і напярэдадні свята — Дня работніка сельскай гаспадаркі і перапрацоўчай прамысловасці аграпрамысловага комплексу — кожная гаспадарка падводзіць вынікі работы, аналізуе свае паказчыкі, дасягненні і тое, над чым трэба яшчэ папрацаваць.
Не выключэнне — і ААТ “Сейлавічы”, якое спецыялізуецца на малочна-мясной жывёлагадоўлі і вырошчванні збожжавых культур. Нягледзячы на тое, што год быў складаным па ўмовах надвор’я, працаўнікам гаспадаркі ўдалося дабіцца нядрэнных вынікаў.

Механізатар Уладзімір
Праневіч

Як расказаў дырэктар гаспадаркі Аляксандр Каспер, збожжа ў “Сейлавічах” сёлета намалацілі 7418 тон пры сярэдняй ураджайнасці 66,8 ц/га, рапсу сабралі 1039 тон з плошчы ў 270 гектараў пры ўраджайнасці 38,5 ц/га. Яшчэ адна важная для эканомікі сельгаспрадпрыемства культура — цукровыя буракі — сёлета заняла тут 310 гектараў, якія ўжо ўбраныя. На дзень здачы газеты ў друк іх было накапана 21700 тон, ураджайнасць склала 700 ц/га.

Выконваў гэту складаную работу Уладзімір Праневіч — адказны і дасведчаны ў гэтай справе механізатар, які на сваім “FRANZ KLEINE SF-10-2” ужо не першы сезон убірае салодкі корань.
Своечасова была завершана сяўба азімых збожжавых — ячменю, пшаніцы, трыцікале, якія занялі 1010 гектараў, і 250 гектараў рапсу. На 570 гектарах праведзена ўзворванне зябліва. На гэтай рабоце быў заняты яшчэ адзін дасведчаны механізатар Мікалай Кісун, які на энерганасычаным трактары забяспечвае якасную падрыхтоўку глебы. За сезон ён узараў амаль 1463 гектары.

Яшчэ адзін важнейшы пласт работ, якія выконваюць аграрыі “Сейлавіч”, — забеспячэнне кармамі жывёлагадоўчай галіны гаспадаркі, ад чаго напрамую залежыць яе паспяховая работа. Так, сёлета тут было нарыхтавана 445 тон сена, 11269 тон сенажу, 18100 тон сіласу.

І сапраўды, жывёлаводы “Сейлавіч” шчыруюць з усёй адказнасцю: валавы надой малака па гаспадарцы за 10 месяцаў гэтага года склаў 9001 тон, або 103,4% да ўзроўню мінулага года, удой на карову — 6835 кілаграмаў. 3865,3 тоны, або 106,5% да мінулагодняга, атрымана на МТФ №2 “Андрушы”, надой на карову тут склаў 7731 кілаграмаў. 3878,5 тоны, або 105,5% ў параўнанні з леташнім — на МТФ №4 “Сейлавічы”, надой на карову тут — 7039 кілаграмы.

Механізатар Мікалай Кісун

Парадавала і прадуцыя вырошчвання буйной рагатай жывёлы: за гэты ж перыяд яна склала 386,7 тоны, або 102,4% да адпаведнага перыяду мінулага года. Сярэднесутачная прывага БРЖ — 714 грамаў, або 104,1% у параўнанні з мінулагоднім.

Прадукцыя вырошвання свіней дасягнула 975 тоны, або 123,4% да леташняга паказчыка. Гэтага ўдалося дасягнуць за кошт перагляду падыходаў да кармлення жывёлы і натуральнага прыросту пагалоўя. Палепшыліся і сярэднесутачныя прывагі свіней — 584 грамы, або 114,3% да ўзроўню мінулага года.
— Падагульняючы сказанае, — падвёў рысу пад сваім аповедам Аляксандр Каспер, — трэба адзначыць, што вытворчасць валавай прадукцыі ў нашай гаспадарцы за 10 месяцаў гэтага года склала 103,4% да мінулагодняга, а рост сярэднемесячнай заработнай платы — 132,8%. Зараз гэты паказчык крыху перавышае 1687 рублёў. Значна павялічылася выручка ад рэалізацыі прадукцыі, работ і паслуг, якая склала 17,9%.

Свой працоўны ўклад ва ўсё гэта ўносяць 202 чалавекі, кожны з якіх заслугоўвае падзякі, таму што робіць свой пасільны ўнёсак ў агульны дабрабыт гаспадаркі.
Карыстаючыся выпадкам, з нагоды прафесійнага свята Аляксандр Каспер пажадаў усім працаўнікам ААТ “Сейлавічы” моцнага здароўя, аптымізму, шанцавання ў справах і дасягнення ўсіх пастаўленых мэтаў.

Соф’я ЛЮБАНЕЦ.