Студэнцкія атрады — калектыўнае сяброўства і праца

На мінулым тыдні ў Мінску прайшла цырымонія закрыцця трэцяга працоўнага семестра.
У ёй прынялі ўдзел каля 250 байцоў студатрадаў з усёй краіны. У спісе лепшых у рэспубліцы — і моладзь Нясвіжчыны. У спецыяльнай намінацыі “За развіццё грамадзянска-патрыятычных традыцый беларускіх студэнцкіх атрадаў” узнагароду атрымаў сэрвісны атрад “Вечнасць” імя Героя Савецкага Саюза А.А. Аляхновіча Нясвіжскага дзяржаўнага каледжа імя Якуба Коласа.

Як адзначыў падчас рэспубліканскай цырымоніі закрыцця намеснік міністра адукацыі Аляксандр Кадлубай, актыў- насць падчас працоўнага семестра — асноўны крытэрый, на якія звярталі ўвагу пры выбары лепшых атрадаў.

— Выхаванне працай — самае эфектыўнае, і студэнцкія атрады выдатна гэтаму спрыяюць, — сказаў Аляксандр Кадлубай. — Упэўнены, гэтая праца павінна маштабавацца. З такім падыходам, як у нашага саюза моладзі, усё атрымаецца.

Сёлета беларускаму студатрадаўскаму руху споўнілася 60 гадоў. І юбілейны год атрымаўся асаблівым. Як падкрэсліў другі сакратар Цэнтральнага камітэта БРСМ Аляксандр Прохараў, было пастаўлена шмат амбіцыйных задач і саюз моладзі паспяхова з імі справіўся. Сёлета ўзрасла і колькасць байцоў: працаўладкавалі больш за 40 тысяч чалавек. Пашырылася геаграфія: хлопцы і дзяўчаты папрацавалі не толькі на рэспубліканскіх праектах, але і міжнародных. Такіх высокіх вынікаў удалося дасягнуць дзякуючы зацікаўленасці дзяцей і падтрымцы дзяржавы.

Студатрадаўцы разам з прадстаўнікамі БРСМ пасля ўзанагароджвання

Незадоўга да рэспубліканскай цырымоніі закрыцця трэцяга працоўнага семестра адбылося падвядзенне вынікаў працы студатрадаў Міншчыны. У трох намінацыях несвіжане былі прызнаныя лепшымі ў сталічным рэгіёне. Так, студэнцкі сэрвісны атрад “Вечнасць” імя Героя Савецкага Саюза А.А. Аляхновіча — лепшы студэнцкі сэрвісны атрад, ААТ “ГАРАДЗЕЙСКІ ЦУКРОВЫ КАМБІНАТ” — лепшы наймальнік, а Нясвіжскі тэрытарыяльны штаб студэнцкіх атрадаў — лепшы тэрытарыяльны штаб студэнцкіх атрадаў раённай арганізацыі ГА “БРСМ” з колькасцю мола-дзі ад 5 да 20 тысяч.

Вынікі працоўнага семестра пракаментавала першы сакратар РК ГА “БРСМ” Кацярына Іюльская:
— Моладзь Нясвіжчыны прыняла ўдзел у адной з самых значных падзей для студэнцкіх атрадаў. Гэта падзея заўсёды чакаецца з нецярпеннем кожным удзельнікам студэнцкага атрада, таму што на рэспубліканскім закрыцці трэцяга працоўнага семестра заўсёды пануе асаблівая атмасфера. Тут ты адчуваеш сябе часткай вялікай сям’і. Назіраючы, якая значная роля адводзіцца моладзі Беларусі ў развіцці краіны і колькі намаганняў укладзена ў гэтую працу, я зноў пераканалася ў тым, што студэнцкія атрады — гэта крыніца моцы і сілы!

Прыемна, што з кожным годам студатрадаўскі рух набірае ўсё большую папулярнасць. Да нас паступае больш анкет для працаўладкавання, больш моладзі было працаўладкавана ў гэтым годзе. Для прыкладу: сёлета адпрацавалі 204 байцы студэнцкіх атрадаў, а летась — 141. Занятыя былі хлопцы і дзяўчаты практычна па ўсіх магчымых профілях работ: ад сельскагаспадарчых да будаўнічых і сэрвісных. Адзіны незакрануты профіль — гэта медыцынскі.

Сваімі ўражаннямі ад цырымоніі і ад работы ў студатрадзе ўвогуле падзялілася камісар сэрвіснага атрада “Вечнасць” імя Героя Савецкага Саюза А.А. Аляхновіча Нясвіжскага дзяржаўнага каледжа імя Якуба Коласа Дзіяна Іванова:

— Той дзень пачаўся з таго, што мы наведалі мемарыяльны комплекс Хатынь, дзе аддалі дань памяці людзям, якія загінулі падчас Вялікай Айчыннай вайны. Гэта ўскладанне кветак пакінула моцны адбітак у маёй памяці, бо менавіта ў мемарыяльным комплексе наш атрад і працаваў. У “Хатынь” мы ехалі ў якасці наглядальнікаў, але супрацоўнікі музея вырашылі даць нам магчымасць праявіць сябе экскурсаводамі. У новым музеі шмат сучасных тэхналогій, а падчас навучання ў каледжы мы добра навучыліся карыстацца імі для працэса выкладання. Таму засталося толькі вывучыць інфармацыю па музейных экспанатах і здаць экзамен работнікам музея.

А падчас самой цырымоніі ўзнагароджання атрадаў мы былі прыемна здзіўлены і ўражаны гонарам, які нам аказалі, — менавіта наш атрад быў названы лепшым у развіцці грамадзянска-патрыятычных традыцый беларускіх студэнцкіх атрадаў. Вельмі прыемна, што ў гэтым годзе ўвялі гэту спецыяльную намінацыю і менавіта мы сталі ў ёй пераможцамі. Хоць наш атрад і невялікі — усяго пяць чалавек, — але мы змаглі добра праявіць сябе. Мы атрымалі памятныя прызы і падарункі ад цэнтральнага камітэта БРСМ. Кожны з нас ганарыцца магчымасцю пабываць на такім мерапрыемстве і хоць крыху, але праславіць нашу малую радзіму — Нясвіжскі раён.

Хоць на сённяшні дзень я ўжо скончыла каледж і з’яўляюся настаўніцай пачатковых класаў, але з задавальненнем яшчэ раз папрацавала б у студэнцкім працоўным атрадзе. Была б толькі магчымасць. Бо студэнцкі атрад — гэта братэрства маладых людзей, якія падтрымліваюць і абараняюць адзін аднаго.

Сапраўды, вопыт байцоў студэнцкіх атрадаў дазваляе кожнаму значна хутчэй і лягчэй пераадолець жыццёвыя шляхі станаўлення. Гэта асобы соцыум, калектыўная дружба і праца — лепшая школа жыцця. Самы карысны трэнінг — гэта месяц ці два папрацаваць плячом да пляча з абсалютна рознымі маладымі людзьмі: тут табе і канфлікталогія, і першыя грошы — пабудова асабістага бюджэту; камунікацыя з рознымі групамі асоб — і экстравертамі, і інтравертамі. Для маладых лідараў — гэта першы кіраўнічы вопыт, калі вакол цябе такія ж амбіцыйныя, як і ты, а ты павінен стаць для ўсіх аўтарытэтам. Няма лепшай сацыялізацыі, чым студэнцкія атрады. І кожны, хто прайшоў праз сапраўдны студэнцкі атрад, будзе ўспамінаць гэты час усё сваё жыццё!

Трэці працоўны семестр завяршыўся, а цёплыя ўспаміны аб сумеснай працы, новых знаёмствах назаўжды застануцца з моладдзю!

Неаніла ЛЮБАНЕЦ.