Инна ВАСИЛЕВИЧ Напярэдадні Дня маці — свята, якое ў душы кожнага чалавека займае асаблівае месца, у Заазерскай сельскай бібліятэцы аб’ядналіся дарослыя і дзеці. Сюды, у клуб вясёлых і знаходлівых, навучэнцы Нясвіжскай гімназіі запрасілі сваіх любімых матуль, каб разам правесці час, падзяліцца інтэлектуальнымі знаходкамі, проста павесяліцца.
Настрой задавала святочная атмасфера ў памяшканні бібліятэкі, кожнаму “ўсміхаліся” шарыкі, якія ў руках трымалі школьнікі.
У праграме мерапрыемства задзейнічаны былі ўсе жадаючыя. Сачыненні дзяцей з цёплымі словамі пра сваіх матуль, конкурсныя заданні, імправізаваныя флэш-мобы дарослых і дзяцей захапілі пазітывам і станоўчымі ўражаннямі. Ацэньвала конкурсы журы, у склад якога ўвайшлі актыўныя чытачы бібліятэкі — Вераніка Гарунова і Вера Хаменка.
Прыгожыя чатырохрадкоўі, літаратурныя хвілінкі, музычныя кліпы выклікалі самыя шчырыя эмоцыі. Бібліятэкар Наталля Дылеўская пазнаёміла прысутных з гісторыяй святкавання Дня маці, нагадала пра асаблівую ролю мамы ў жыцці кожнага чалавека, павіншавала жанчын-мам са святам, якое прыходзіць да нас разам з адным з самых важных праваслаўных асенніх святаў — Пакравоў Найсвяцейшай Багародзіцы.
— Спадзяюся, што чарговая тэматычная сустрэча ў нашай бібліятэцы нікога не пакінула раўнадушным. Кожная з мам яшчэ раз адчула, з якой любоўю ставяцца да яе дзеці, якія пачуцці выклікаюць прыемныя сюрпрызы, падрыхтаваныя імі. Падчас конкурсаў і дарослыя, і дзеці захапляліся кемлівасцю і талентам адзін аднаго, — падкрэсліла ў заключэнне Наталля Фёдараўна. — Верыцца, што такое яднанне ў Дзень маці стане адной з трывалых прыступак сямейнага выхавання, а дома ў кожнага будуць панаваць лад і пяшчота.
У заключэнне сустрэчы усіх удзельнікаў свята для мам чакалі салодкія пачастункі і торт.
Іна ВАСІЛЕВІЧ.
