Нясвіжскія навіны Напрыканцы верасня ў Беларусі прайшоў IV Фестываль мастацтваў беларусаў свету. Яго арганізатары — Міністэрства культуры, Рэспубліканскі цэнтр нацыянальных культур, Упаўнаважаны па справах рэлігій і нацыянальнасцей.
За межамі нашай краіны зараз пражываюць каля 1,5 млн беларусаў. Афіцыйна зарэгістраваныя і дзейнічаюць каля 220 грамадскіх аб’яднанняў. Самая вялікая беларус- кая дыяспара — у Расіі. Там — 80 беларускіх грамадскіх арганізацый. Як падкрэслівае Мітрапаліт Мінскі і Заслаўскі Веніямін, Патрыяршы Экзарх усяе Беларусі, “у кожнага — свой шлях, важна, каб чалавек жыў у любові і згодзе, дзе б ён ні знаходзіўся”.
У фестывалі бралі ўдзел каля 250 гасцей з розных краін свету: Арменіі, ЗША, Іспаніі, Італіі, Казахстана, Латвіі, Літвы, Эстоніі і многіх рэгіёнаў Расійскай Федэрацыі. Прайшла дыялогавая пляцоўка “Беларусь — краіна яднання” ў Храме-помніку ў гонар Усіх святых. Удзельнікі фестывалю ў музеі Янкі Купалы сустрэліся з членамі Саюза пісьменнікаў Беларусі, у Нацыянальным мастацкім музеі — з членамі Беларускага саюза мастакоў, у Мінскім абласным цэнтры народнай творчасці — з сябрамі Беларускага саюза майстроў народнай творчасці. Прайшлі майстар-класы па беларускай харэаграфіі, вакале, дэкаратыўна-прыкладным мастацтве. Госці прадэманстравалі свой талент і творчыя дасягненні. Яны таксама наведалі мемарыяльныя комплексы “Хатынь” і “Трасцянец”, ушанавалі памяць людзей, што загінулі ў пажары мінулай вайны ад рук акупантаў беларускай зямлі.
Нябачнай нітачкай гэта памяць аб жахах Другой сусветнай вайны звязвае нас з Італіяй. На могілках у Монтэ-Касіна пахаваны каля 240 беларускіх салдат, якія на італьянскай зямлі аддалі сваё жыццё ў барацьбе з фашызмам. Нагадаю: там пахаваны і ўраджэнец Нясвіжа сяржант Антон Мікалаевіч Сабірай, ён загінуў 12 мая 1944 года. Удзельнік фестывалю Таццяна Пумпулева, кіраўнік беларускага культурнага таварыства ў Неапалі, расказала, што яны вясной заўсёды едуць на могілкі, разам з беларускім пасольствам арганізуюць Дзень памяці. Яшчэ яна апавяла, як яны знаёмяць італьянцаў з беларускімі традыцыямі: праводзяць “Дажынкі”, Дзень маці, Дзень настаўніка, свята “Пакровы”, восеньскія вяселлі, калядныя ранішнікі. Таццяна так хораша звярнулася да ўсіх: “Дарагія беларусы, ніколі не губляйце вашага аптымізму, упэўненасці ў сабе, гонару за нашу краіну і любові да яе. Усё, што вы робіце, грашыма вымераць немагчыма. Не забывайце наша роднае неба і нашы карані”.
Іспанцаў у нас цікавяць турызм, аздараўленне і адукацыйныя праекты. Прыязджаюць у Беларусь жыхары Пірэней розных узростаў. Аб гэтым паведаміла кіраўнік Усеіспанскай асацыяцыі беларусаў Святлана Яськова з Мадрыда.
Прадстаўнік беларускай дыяспары з амерыканскага Балцімора, кіраўнік канцэртнага агенцтва Ала Сандлер адзначыла, як моцна Беларусь змянілася да лепшага за апошнія 30 гадоў.
Сяргей Кандыбовіч, старшыня грамадскай арганізацыі “Федэральная нацыянальна-культурная аўтаномія беларусаў Расіі” (Масква) падкрэсліў: “Беларусы валодаюць самым каштоўным відам мастацтва — мастацтвам сябраваць і быць людзьмі!”.
І сапраўды, Беларусь з’яўляецца прыкладам краіны, у якой мірна жывуць людзі 29 канфесій і рэлігійных аб’яднанняў, 156 нацый і нацыянальнасцей. Усім наша дзяржава на канстытуцыйным узроўні забяспечвае роўныя правы.
Праз беларусаў замежжа ў самыя аддаленыя куточкі планеты даносіцца аб’ектыўная інфармацыя аб тым, як і чым сёння жыве наша краіна, праз сапраўдных беларусаў, хто на фестываль прывёз “родныя беларускія песні ды тугу па Радзіме”.
