Нясвіжскія навіны Сёняшняя сонечная раніца ў аграгарадку Карцэвічы на пляцоўцы каля сквера была напоўнена гоманам людзей, гучала музыка. Тут адбыўся чарговы восеньскі кірмаш, адзін з тых, што будуць ладзіцца на працягу кастрычніка ў розных населеных пунктах раёна.
Попытам на гэты раз карысталіся самыя розныя тавары. 
Сваю прадукцыю тут прапанаваў рыбгас “Альба”. Зіхацелі лускою жывыя карп, карась, амур, якіх мясцовыя жыхары набывалі па цане 8,5 рубля, 4,57 і 8,25 — адпаведна.
“Нясвіжскі райаграсэрвіс” прапанаваў спажыўцу збожжа,кукурузу, цыбулю, буракі, бульбу. Ладна ішоў гандаль ля машыны са збожжам. Ячмень, напрыклад, гаспадары набывалі па 50 капеек за 1 кг, пшаніцу — па 55 капеек, кукурузу і бульбу — па 60 капеек за кілаграм. 
Прадавец магазіна №4 “Нясвіжскага райаграсервісу” ў аг. Карцэвічы ў час выязнога гандлю прапанавала пакупнікам чабурэкі, смажанкі, жараныя каўбасу і рыбу да стала мясцовага гатунку. Добра таксама разыходзіліся піражкі па 85 капеек з капустай і павідлам, блінчыкі з тварагом і павідлам па 9,55 і 6,95 за кілаграм адпаведна, набывалі гаспадыні і галубцы па 10,55 за 1 кілаграм.
Гаспадар з вёскі Старына Капыльскага раёна прапанаваў на кірмашы мёд розных гатункаў — некалькі відаў па 8 рублёў за 700 г., за 50 г. праполісу прасілі 5 рублёў.
Гаспадары з Мацылёўшчыны прапанавалі вялікі выбар саджанцаў. Яблыня, груша, сліва, чарэшня каштавалі па 20 рублёў, зімаўстойлівыя сарты персіка і абрыкоса па 25 рублёў, парэчка чорная, чырвоная і белая — па 6 рублёў за куст. Набывалі тут гібіскус, шаўковіцу, грэцкі арэх і кусты буяку (у прастамоўі — галубікі). Трускалкі раннія каштавалі па 10 рублёў за 12 каліў.
У час сустрэчы на кірмашы старшыня Нясвіжскага сельскага выканаўчага камітэта Сяргей Белазаровіч падзяліўся настроем:
Штогод у раёне праводзяцца асеннія і веснавыя кірмашы. Гэта вельмі зручна для вясковых жыхароў. Сёння , напрыклад, людзі змаглі набыць збожжа для ўласнай гаспадаркі, купіць жывую рыбу, агародніну, кветкі і саджанцы. Настрой у вяскоўцаў добры, а іх запыты мы заўсёды стараемся выканаць. Вельмі прыемна, што на запрашэнні адгукнуліся прадпрымальнікі з суседніх рэгіёнаў.
Асеннія кірмашы ў Нясвіжскім раёне працягваюцца. Чарговыя адбудуцца 8 кастрычніка на цэнтральным рынку Нясвіжа і 11 кастрычніка з 12.00 да 15.00 у аграгарадку Астроўкі, на аўтастаянцы каля СДК па вуліцы Першамайскай.
