Аб перапрацоўцы цукровых буракоў

З пачаткам верасня на Гарадзейскім цукровым камбінаце пачалася актыўная нарыхтоўка і перапрацоўка цукровых буракоў. Каб зразумець, як наладжаны гэты працэс і як ён праходзіць сёлета, мы прыехалі непасрэдна на камбінат. І вось, што нам распавялі.

— У цэлым, гэты год радуе, — адзначае начальнік сыравіннага аддзела Іван Баброўскі. — Часткова гэта звязана з пашырэннем плошчы пасеваў, але асноўным, вызначальным фактарам стала, як і заўсёды, надвор’е. Усё астатняе ўжо навучыліся абыходзіць, а надвор’е — тое, што ад нас не залежыць.

На буракапрыёмны пункт сыравіна паступае з чатырох абласцей рэспублікі: Мінскай, Гродзенскай, Магілёўскай і Віцебскай.
— Што тычыцца Мінскай вобласці, то вырошчваннем займаюцца ў Нясвіжскім, Стаўбцоўскім, Мінскім, Валожынскім, Дзяржынскім, Маладзечанскім, Капыльскім і Вілейскім раёнах. Асноўнымі пастаўшчыкамі буракоў з Гродзенскай вобласці з’яўляюцца Карэліцкі і Навагрудскі, сёлета аднавілі пастаўкі з Зэльвенскага, Слонімскага і Лідскага раёнаў. Гэта ключавыя нашы партнёры, — працягвае Іван Станіслававіч. — Калі казаць канкрэтна пра Нясвіжскі раён, то ён, безумоўна, лідар у пастаўках. Гаспадаркі перавыконваюць леташнія лічбы — на сённяшні ранак на камбінат дастаўлена больш за 85 тысяч тон сыравіны.
Сёлета Гарадзейскі цукровы камбінат плануе атрымаць каля 1 мільёна 150 тысяч тон сыравіны. Зараз ідзе масавая яго нарыхтоўка. Усяго па камбінаце, з улікам буракапрыёмнага пункта, чыгуначнай дастаўкі і іншых, выканана ўжо амаль чацвёртая частка ад плана.
— Што тычыцца непасрэдна буракапрыёмнага пункта, то тут з пачатку кампаніі прынята больш за 270 тысяч тон. Большая частка, натуральна, пайшла на перапрацоўку, каля трыццаці тысяч ляжыць на захоўванні, — адзначае спецыяліст.
Дарэчы, нарыхтоўваць сыравіну на камбінаце пачалі на першым тыдні верасня. Нарыхтоўка на захоўванне пачнецца бліжэй да сярэдзіны кастрычніка.
— На перапрацоўку прагназуемага аб’ёму сыравіны нам спатрэбіцца каля 110-115 сутак актыўнай працы, — адзначае галоўны тэхнолаг Юрый Хмелінка. — Выхад цукру ў першую чаргу залежыць ад цукрыстасці буракоў. Цяпер гэты паказчык — каля 17%, таму аб’ём канчатковага прадукту прагназуецца ў раёне 150 тысяч тон. Мы працуем ужо больш за тры тыдні. Атрымалі за гэты час каля 30 тысяч тон цукру. Камбінат выйшаў на перапрацоўку 10 тысяч тон буракоў у суткі, з атрыманнем 1300-1400 тон цукру штодня. І смела можна сцвярджаць, што пастаўлены план будзе выкананы.
Дар’я ПІВАВАРСКАЯ.