Нясвіжскія навіны Узяцца за разважанне на спартыўную тэму мяне падштурхнуў спартыўна-культурны фестываль “Вытокі. Крок да Алімпу”, які нядаўна прайшоў у Барысаве — яскравы, цікавы і захапляльны.
І хаця аўтар гэтых радкаў — чалавек далёкі ад вялікага спорту, напэўна, усе пагодзяцца з тым, што ніхто не прымушае кожнага з нас станавіцца вялікім спарт- сменам. Мы ўсе — розныя, і калі аднаму з нас падабаецца штурхацца ў гушчыні людзей і выхопліваць адзін у аднаго мяч у камандных гульнях, то другому бліжэй да душы удзел у індывідуальных спабрніц- твах, накшталт спартыўнай ці мастацкай гімнастыкі. А яшчэ камусьці дастаткова выканаць аздараўленчыя практыкаванні дома ці ў спартзале пад кіраўніцтвам фітнес-трэнера. Кожнаму, як кажуць, сваё!
Галоўнае — не ленавацца і памятаць, што рух — гэта жыццё! А спорт — гэта не што іншае, як рух — мэтанакіраваны, станоўчы і вельмі патрэбны. Падчас выканання розных фізічных практыкаванняў ад мускулатуры да мозгу адпраўляюцца мільёны нервовых імпульсаў, яны прыводзяць усю нервовую сістэму ў падвышаны дзейны стан, гэта выклікае актывізацыю работы ўнутраных органаў, павялічвае працаздольнасць чалавека, дорыць прыліў сіл і бадзёрасці. Спорт — гэта неад’емная частка здаровага ладу жыцця, ім займаюцца дзеля ўласнага задавальнення і дзеля карысці для здароўя.
Будзем жа памятаць, што спорт — гэта, па-першае, добрае фізічнае здароўе, бо ён патрабуе бесперапыннай напружанай працы, што прыводзіць у тонус арганізм і мышцы нашага цела. Гэта добры спосаб умацаваць сардэчна-сасудзістую сістэму падчас заняткаў на цягавітасць і сілу. Да таго ж гадзіна любой трэніроўкі дазваляе спаліць ад 300 да 600 калорый, у залежнасці ад інтэнсіўнасці.
Па-другое — выдатная каардынацыя паміж рукамі і вачамі, што дазваляе вам лепш засяроджвацца на вызначаных рэчах. Гэта будзе карысна не толькі ў спорце, але і ў штодзённай дзейнасці.
Па-трэцяе — добрая фізічная форма. Многія людзі скардзяцца, што ў іх няма дастаткова часу для трэніровак, з-за чаго яны дадаюць лішнія кілаграмы. Аднак заняткі спортам дазваляюць трымаць вас у добрай форме без лішніх намаганняў. Яны зараджаюць вас энергіяй, да таго ж гэта весела і цікава.
Па-чацвёртае — зняцце стрэсу. Спорт — гэта добры спосаб пазбавіцца стрэсу і дэ- прэсіі. Канцэнтрацыя на ім лёгка адцягвае ад праблем паўсядзённага жыцця.
Па-пятае — сацыялізацыя. У час заняткаў спортам у вас ёсць мноства магчымасцяў пазнаёміцца з новымі людзьмі і завязаць цікавыя знаёмствы.
Па-шостае — карысць для сну. Усе віды спорту ўключаюць у сябе вялікую колькасць фізічнай актыўнасці, з-за чаго вы будзеце адчуваць прыемную стомленасць, і, каб аднавіцца, арганізм запатрабуе моцнага і працяглага сну.
І, ці не самае галоўнае, — заняткі спортам даюць не толькі неабходную фізічную нагрузку, але і задавальненне ад жыцця, а калі ў цябе добры настрой, то і ўсе астатнія справы ладзяцца, а складанасці пераадольваюцца лягчэй і хутчэй. А таму, як кажуць, памажы сабе сам. Для пачатку — займіся спортам!
