Нясвіжскія навіны У суботу, 19 жніўня, народнае свята “Дажынкі-2023” адсвяткавала ДП “Эксперыментальная база Свеклавічная”.
Хлеб заўжды лічыўся сімвалам жыцця, урадлівасці і дабрабыту простага народу. Нездарма людзі кажуць: “Будзе хлеб — будзе дом багаты”.
Сімвал паспяховага заканчэння ўборкі — апошнія дажыначныя снапы — намесніку дырэктара дзяржаўнага прадпрыемства “Эксперыментальная база Свеклавічная” Андрэю Вітко і галоўнаму аграному Яўгенію Саліце уручылі пераможцы жніва камбайнер Радыён Панкрат і вадзіцель Генадзь Янкоўскі. 
Праца на зямлі ніколі не была лёгкай, і кожны чалавек павінен ведаць яе сапраўдны кошт. І падчас свята людзей, якія ведаюць, колькі намаганняў трэба прыкласці, каб бохан хлеба з’явіўся на нашым стале, павіншавалі намеснік дырэктара дзяржаўнага прадпрыемства “Эксперыментальная база Свеклавічная” Андрэй Вітко, які ўручыў узнагароды ад гаспадаркі пераможцам жніва, галоўны аграном гаспадаркі Яўген Саліта, галоўны інжынер-механік Юрый Радзюк і старшыня прафсаюзнага камітэта дзяржаўнага прадпрыемтсва “Эксперыментальная база Свеклавічная” Кацярына Мархель.
Асобныя віншаванні героям дня адрасавала старшыня прафсаюзнай арганізацыі Беларускага прафсаюза работнікаў АПК Святлана Антончык. Яна таксама ўручыла Граматы раённай арганізацыі за працоўны ўклад у атрыманне ўраджаю і правядзенне ўборкі галоўнаму аграному гаспадаркі Яўгену Саліце, галоўнаму інжынеру-механіку Юрыю Радзюку і трактарысту машыністу Івану Карпачу. Працаўнікі “Свеклавічнай” былі адзначаны і ўзнагародамі раённай улады. Так, Падзячнае пісьмо старшыні райвыканкама атрымала аграном-насеннявод Алена Даменікоўская, Падзякі старшыні райвыканкама бьлі аб’яўлены вадзіцелю Дзмітрыю Янукевічу і загадчыку рамонтнымі майстэрнямі Радзіёну Панкрату.
З малітвай-падзякай за добрае правядзенне жніва перад удзельнікамі свята выступіў настаяцель храма Нараджэння Найсвяцейшай Багародзіцы г.п. Гарадзея, протаіерэй Аляксандр Цяляк.
Пацвярджэннем шчодрасці роднай зямлі сталі караваі з мукі новага ўраджаю, якімі прыгожыя дзяўчаты ў святочных касцюмах частавалі ўдзельнікаў урачыстасці, што асабліва парадавала самых маленькіх з іх.
Святочнага настрою ўсім прысутным дадалі музычныя падарункі ў выкананні народнага ансамбля песні “Забава” пад кіраўніцтвам Вольгі Александровіч і вядучых мерапрыемства Кацярыны Шустал і Дзмітрыя Дэмуха.
