Нясвіжскія навіны Нясвіжская цэнтральная раённая бібліятэка імя Паўлюка Пранузы каля помніка сымону Буднаму ўвазе жыхароў і гасцей горада прапануе інтэрактыўную пляцоўку “Нясвіж — горад людзей, якія чытаюць”, у якой сабрана шмат цікавых міні-лакацый.
Кніжная выстаўка “У лабірынце лёсу і жыцця” знаёміць усіх жадаючых з біяграфіяй Паўлаюка Пранузы, беларускага паэта, ганаровага грамадзяніна горада Нясвіжа, ветэрана Вялікай Айчыннай вайны, які ўнёс значны ўклад у літаратурную спадчыну нашай краіны. Тут можна ўбачыць невялікую падборку твораў з ягонай паэтычнай скарбніцы, зрабіць памятнае фота. Для гэтага аформлена фотазона ў выглядзе кабінета паэта.
Сапраўдных знатакоў творчасці Паўла Кузьміча запрашаюць успомніць і прачытаць любімыя вершы паэта “са смакам”, напісаць і надрукаваць свае лірычныя творы на друкарскай машынцы таго часу.
На кніжнай выставе “Кніга. Час. Я” сабраны творы паэтаў Нясвіжскай зямлі, добрых сяброў бібліятэкі, якія сталі прадаўжальнікамі традыцый П. Пранузы.
Экспазіцыя “Вялікая гісторыя маленькай сталіцы” прысвечана гораду Нясвіжу. На выставе вы знойдзеце матэрыял пра ўзнікненне, развіццё, перыяд найвышэйшага росквіту горада, пра яго архітэктурныя славутасці, багатую культурную спадчыну.
Аддзел па рабоце з дзецьмі цэнтральнай бібліятэкі прадстаўляе інтэрактыўную пляцоўку “Мы ўсе разам — Беларусь”, з дапамогай якой удзельнікі па-сапраўднаму змогуць акунуцца ў чароўны свет нашай роднай краіны.
Вас чакаюць кніжныя “Крыжыкі-нулікі”, лато “Вандруй цікава”, даміно “Нясвіж”, лэпбук “Знайдзі сваю Беларусь”, лабірынт “Пазнай Беларусь”, марскі бой, фотарамкі. Аматараў чытання запрашае кніжная выстаўка “Квітней пад небам сінім, Беларусь”, аблокі слоў, QR-квесты. Кожны знойдзе сабе забаўку па душы.
Заазерская СБ сумесна з Карцэвіцкай СБ увазе наведвальнікаў прадстаўляюць інтэрактыўную пляцоўку “Легенды і паданні Нясвіжа”, дзе вы даведаецеся гісторыю паўстання горада. Вас чакае гістарычная віктарына-тэст, акцыя “Добрыя словы да юбілею горада”.
Гарадзейская дзіцячая бібліятэка сумесна з Ужанкаўскай СБ сустракаюць гасцей на гульнявой пляцоўцы “Разам-свята!”. Для іх падрыхтаваны “крыжыкі-нулікі”, фотарамкі, крыжаванкі і галаваломкі, працуе мастацкая лабараторыя.
Затур’янская і Высокаліпская СБ усіх жадаючых запрашаюць наведаць майстар-клас па вырабе эксклюзіўнай вазы ў тэхніцы “нітачная філігрань”.
Новагарадэйская гарпасялковая бібліятэка прадстаўляе майстар-клас па вырабе неверагодна прыгожых архідэй “Чароўны фааміран”.
Ланская СБ сумесна са Слаўкаўскай СБ запрашаюць дзяцей і дарослых наведаць тэатр лялек “Батлейка”. Вас чакае міні-прадстаўленне “Таямніцы бібліятэкі Раддзівілаў”
Да нас на свята прыехалі і бібліятэкары суседніх раёнаў. Прадстаўлена работа пляцовак бібліятэк Мінскай вобласці з Клецка, Стоўбцаў, Узды, Дзяржынска, Капыля і Брэсцкай вобласці — Баранавіцкай раённай цэнтралізаванай бібліятэчнай сістэмы.
