Нясвіжскія навіны Нядаўна Еўрасаюз узгадніў чарговы пакет санкцый супраць Рэспублікі Беларусь. Польшча націснула на “калег”, каб накласці вета на пастаўку запчастак для аўтамабіляў. Аргументуе такі крок тым, што, маўляў, запчасткі могуць выкарыстоўвацца беларусамі ў ваеннай сферы.
З боку нашых бліжэйшых заходніх сусе-дзяў прагучала на днях яшчэ адна інсінуацыя: трэба зусім закрыць граніцу паміж Польшчай, Літвой, Латвіяй — і Беларуссю. Пабудаваць яшчэ адну сцяну. Рэальную ці віртуальную? Цікава, як яе назавуць, каб пераплюнуць Берлінскую? Полбалт? Літлатполь? А што панскім палітыкам хочацца пераплюнуць тое, што было ці ёсць у кагосьці — дык гэта абавязкова, бо гонар, як цеста на дражджах, прэ праз усе дзіркі. Не лепшыя якасці і ў менталітэце сённяшняй прыбалтыйскай “эліты”. І той факт, што гэтым яны пазбавяць сваіх грамадзян магчымасці звычайных зносінаў — сваяцкіх, сяброўскіх, гандлёвых, культурных, аздараўленчых — палітыкамі не ўлічваецца, правы простых людзей для іх — пусты гук. Толькі ўласныя амбіцыі і жаданне ў чарговы раз дагадзіць заакіянскаму гаспадару, насаліць як мага болей Беларусі і Расіі.
А Рэспубліка Беларусь — дружалюбная і адкрытая краіна. Мы ўсе гады ладзілі стасункі з іншымі дзяржавамі, незалежна ад іх палітычных і эканамічных светапоглядаў. І зараз гатовы прымаць усіх, хто жадае пагля- дзець Беларусь, пазнаёміцца з нашым жыццём, эканомікай, культурай, адпачыць на лоне прыгожай беларускай прыроды. І людзі едуць. Каб паўдзельнічаць у “Славянскім базары ў Віцебску”, прыязджалі артысты з 35 краін пяці кантынентаў зямнога шара. З былых савецкіх рэспублік — Расіі, Грузіі, Латвіі, Арменіі, Казахстана, Кыргызстана, Узбекістана, Малдовы, Эстоніі… А таксама Кубы, ЗША, Германіі, Італіі…Упэўнена, што кожны паехаў дамоў з добрымі, пазітыўнымі эмоцыямі.
Фестываль у Віцебску стаў сімвалам яднання людзей розных нацыянальнасцей, для якіх дзяржаўныя межы, складаная з-за санкцый супраць Беларусі лагістыка не сталі перашкодай.
Другім такім грандыёзным мерапрыемствам, якое апраўдвае лозунг “О спорт, ты — мір!”, з’яўляюцца II Гульні краін СНД, што праходзяць у Беларусі 4 — 14 жніўня. Сёння — іх урачыстае адкрыццё. Спартсменаў прымае 11 гарадоў. У Мінску пройдуць спаборніцтвы па лёгкай атлетыцы, мастацкай гімнастыцы, пляжнаму футболу, кулявой стральбе, баскетболу 3х3, міні-футболе і сучасным пяцібор’і. У Гродне — па хакеі на траве і цяжкай атлетыцы. У Брэсце — па плаванні і гандболе, у Гомелі — па дзюдо, у Магілёве — па стральбе з лука і каратэ, у Віцебску — па тайскаму боксу, у Жлобіне — па самба, у Салігорску — па грэка-рымскай, вольнай і жаночай барацьбе, у Маладзечне — па пляжнаму валейболу, у Оршы — па боксу, у Барысаве — па міні-футболу. Удзел бяруць не толькі спартсмены краін СНД, сюды запрасілі і іншыя краіны. Акрэдытаваліся звыш 2 тысяч спартсменаў 23 дзяржаў, у т.л. Кубы, Кітая…
Уваход на спаборніцтвы бясплатны, у т.л. і для замежных гасцей. Для іх прадугледжаны і бязвізавы рэжым, згодна з Указам №134 Прэзідэнта Беларусі. Балельшчыкі могуць таксама паехаць на экскурсію па нашай краіне: у Брэсцкую крэпасць, Мірскі і Нясвіжскі замкі, Белавежскую пушчу, Бярэзінскі запаведнік. Прэс-сакратар нашага Міністэрства замежных спраў Анатоль Глаз напярэдадні сказаў: “На фоне агрэсіўнай палітыкі па абмежаванні камунікацый паміж людзьмі мы, наадварот, максімальна спрабуем адкрыцца для суседніх дзяржаў, паказаць, як жывём, запрасіць у госці сюды. Мы хочам зрабіць і зробім свята сапраўднага спорту, дзе людзі будуць спаборнічаць і высвятляць адносіны на спартыўных арэнах. Мы падорым свята, не азмрочанае візавымі і іншымі абмежаваннямі”.
Усе, хто жадае, могуць набыць карту балельшчыка. Яна дае права на наведванне розных аб’ектаў па льготнай цане. Да праграмы карты лаяльнасці падключылася да паўтысячы аб’ектаў. Па ёй можна засяліцца ў гасцініцу, наведаць музей, магазін і г.д.
II Гульні краін СНД праходзяць пад дэвізам “Моцны характар — яскравая гульня!”. І Беларусь ужо ў арганізацыі форуму дэманструе свой характар — цвёрды, моцны і — дружалюбны.
Тамара ПРАЛЬ-ГУЛЬ,
г. Нясвіж.
