Нясвіжскія навіны (Пачатак у № 51, 61, 73, 81, 85, 95 за 2022 г.,
№ 3, 11, 18, 26, 36 за 2023 г.)
1954 г. У Нясвіжы адрыты другі дзіцячы сад.
1957 г., кастрычнік. Нясвіжскі маслазавод ужо выканаў гадавы план па выпуску жывёльнага масла на 146,5 %, згушчонага малака — на 113,2 %. План закупу малака — на 130,4 %.
Аб’ём валавой вытворчасці прадукцыі ў раёне вырас у 18 разоў у параўнанні з 1946 г.
1959 г. Створана арганізацыя “Міжкалгасбуд”, пазней гэта — Нясвіжская перасоўная механізаваная калона № 218.
Узведзены новы будынак Нясвіжскай СШ №1.
У раёне праведзена высакавольтная лінія і ў Нясвіжы пабудавана падстанцыя. Электраэнергія пачала паступаць ад аб’яднанай Беларускай энергасістэмы.
Створана Нясвіжская ДЮСШ з аддзяленнямі фехтавання, лёгкай атлетыкі, валейбола.
1959 г., снежань. У строй дзеючых уступіў Другі Беларускі цукровы завод — у г.п. Гара- дзея. Дырэктар завода — Леанід Міхайлавіч Уладзімірскі. Завод узводзіла ўпраўленне “Цукрбуд”. Начальнікам будаўніцтва быў М.М. Сушчэвіч. Адзначалася працавітасць брыгад цесляроў Мацвея Баравіка і Эдуарда Чурылы, рабочых Івана Велянцея, Іосіфа Макарэвіча, Паўла Селязнёва, Аляксандра Скачко, Станіслава Вайцюшонка, Мікалая Кійко. На 120 % выконвала план брыгада рознарабочых Аляксандра Крупко. Паказвала прыклад і комплексная камсамольска-маладзёжная брыгада бетона-растворнага вузла Івана Жэркі.
1961 г. На базе спіртзавода створаны Нясвіжскі завод кармавога біяміцыну (дырэктар Пётр Фролавіч Харытонаў). З 1991 г. гэта — Нясвіжскі завод медпрэпаратаў.
1962 г., 1 мая. Выйшаў першы нумар райгазеты “Чырвоны сцяг” як органа Мінскага абкама КПБ і абласнога Савета працоўных пры Нясвіжскім тэрытарыяльным вытворчым калгасна-саўгасным упраўленні. Яна аб’ядналася з клецкай і капыльскай “раёнкамі”.
1962 г. Замест філіяла Капыльскай аўтабазы № 9 арганізавана Нясвіжская аўтабаза № 17 (дырэктар М.Дз. Грыцай). У 1971 г. — Нясвіжскі аўтакамбінат №1.
Створаны раённы савет ветэранаў вайны (старшыня Аляксандр Кузьміч Рыбакоў).
1964 г. Пасля аб’яднання торфапрадпрыемства “Караліна” нашага раёна і паўбрыкетнага завода “Чырвоная зорка” Клецкага створана торфапрадпрыемства “Чырвоная зорка”.
У Нясвіжы пракладзены першы водаправод.
1965 г. Пабудавана Нясвіжская СШ № 3. Яе першым дырэктарам стаў Яфім Львовіч Злотнікаў.
Адкрылася паветраная лінія Мінск — Нясвіж.
У райцэнтры пабудавалі камбінат бытавога абслугоўвання.
Гарадзейскі цукровы завод паспяхова справіўся з праграмай 1965 г. Выпушчана 469 тысяч цэнтнераў цукру-пяску, на 5 тыс. ц больш задання. Выдатна спрацавалі змены інжынераў Астры Мароз і Алы Дзербянёвай.
1966 г., кастрычнік. У Нясвіжы адбыўся мітынг, прысвечаны падключэнню райцэнтра да газаправода Дашава — Мінск.
Лістапад. На ўскраіне горада на сродкі Ганусаўскай доследнай станцыі ўведзены дзіцячы сад. Ён прыняў 50 дзяцей рабочых і служачых гэтай арганізацыі.
Па вул. Чкалава адкрылі трэці ў горадзе дзіцячы сад.
P.S. Гістарычная хроніка будзе прадоўжана ў наступным выпуску праекта газеты да 800-годдзя Нясвіжа.
Старонку падрыхтавала Тамара ПРАЛЬ-ГУЛЬ.
