І лепшыя каровы Нясвіжчыны

На пляцоўцы плошчай 28,6 тысячы квадратных метраў у Кітайска-Беларускім індустрыяльным парку “Вялікі камень” свае экспазіцыі размясцілі 450 кампаній і прадпрыемстваў з 10-і краін: Беларусі, Расіі, Кітая, Пакістана, Турцыі, В’етнама, Германіі, Італіі, Індыі, Палесціны. З РФ свае напрацоўкі паказвалі 14 рэгіёнаў, а ўсяго прыехалі прадстаўнікі звыш 30-і рэгіёнаў. Акрамя таго, на выставу прыязджалі дэлегацыі Кубы, Егіпта, Ірана, Сірыі, Зімбабвэ, Кеніі, Манголіі, Уганды і Паўднёва-Афрыканскай Рэспублікі.

Беларусь прадэманстравала ўсё самае навейшае, самае лепшае, самае якаснае з таго, што працалюбівыя, таленавітыя людзі яе агракомплексу ўмеюць рабіць. Паказалі ўнікальную сельгастэхніку, племянную жывёлу, прадукты харчавання высокай якасці і іншае.
З многімі краінамі падчас выставы беларускія спецыяліс- ты правялі перамовы аб супрацоўніцтве, аб сумесных праектах. І кантрактаў заключана на шмат болей і на большую суму, чым было на “Белагра-2022”. Беларусь супрацьстаіць санкцыйнаму ціску. І сябе паспяхова забяспечвае прадуктамі харчавання, і экспартуе ў іншыя краіны. Нашу прадукцыю купляюць у ста краінах свету. Летась экспарт прадуктаў харчавання і сельгассыравіны дасягнуў рэкордных 8,3 млрд долараў, што на 24 % болей, чым у 2021 г.
На “Белагра-2023” традыцыйна праходзіў рэспубліканскі конкурс “Лепшая племянная карова малочнай пароды”. Выдатную адзнаку на ім атрымалі прадстаўніцы жывёлагадоўчай галіны нашага раёна.
У намінацыі “Лепшая племянная карова сярод кароў малочных парод па другой лактацыі” першае месца журы прысудзіла Грацыі з малочнатаварнага комплексу “Сычы” СВК “Агракамбінат Сноў”. Яна пакарыла і сваім экстэр’ерам, і прадуктыўнасцю. За папярэднюю лактацыю дала 12 361 кілаграм малака, максімальны сутачны надой быў 56,4 кг. Тлустасць малака — 4,21 %, утрыманне бялку — 3,54 %. Карова па мянушцы Сірэна з гэтага ж комплексу стала другой намінанткай сярод жывёлін чацвёртай лактацыі. Яе валавы надой летась дасягнуў 15 285 кг, максімальны сутачны — 62,7 кг. Для Сірэны гэта быў ужо трэці рэспубліканскі конкурс.
Таксама другое месца, толькі сярод кароў першай лактацыі, заняла Барбі з МТФ “Жанкавічы” ААТ “НОВАЕ ЖЫЦЦЁ”. Яна дае ў суткі па 50 кг малака.
Тамара ПРАЛЬ-ГУЛЬ.