Дарья Пивоварская Час пасяўной кампаніі — адзін з ключавых працэсаў у сельскай гаспадарцы. І не проста так. Кожны з нас разумее: што і як пасееш, тое і пажнеш.
Толькі ўдумайцеся, колькі людзей задзейнічаны ў гэтым працэсе і якая адказнасць ляжыць на іх плячах. Але падставы для сумненняў няма — хлебаробы зладжана і адточана робяць належную працу і дэманструюць добрыя вынікі.
Пра аднаго з такіх — наш невялікі матэрыял.
Міхаіл Міхайлавіч Клімовіч — механізатар у ААТ “Грыцкевічы”. Прыйшоў сюды на працу ў 1988 годзе. Хлопец закончыў Мар’інагорскі дзяржаўны ордэна Знак Пашаны аграрна-тэхнічны каледж імя У.Е. Лабанка па спецыяльнасці “тэхнік-механік” і трапіў на адпрацоўку ў родныя Грыцкевічы. З таго моманту можна смела адлічваць яго працоўны шлях — 35 гадоў. Салідна і, вядома, паважана.
— Галоўнае ў маёй прафесіі жаданне працаваць. Тут адлыньваць нельга, нават і не атрымаецца. Працавітасць і адказнасць павінны быць абавязкова. А яшчэ любоў да зямлі, — тлумачыць механізатар.
Зараз ён ужо завяршыў асноўныя работы па падрыхтоўцы глебы да севу — пахаў, кульцівіраваў, выраўноўваў плошчы. Дапамагаў яму яго транспарт — трактар “Фендт-930”.
Нягледзечы на свой шматгадовы вопыт, Міхаіл Міхайлавіч, акрамя таго, што, безумоўна, перадае гэты вопыт маладзейшаму пакаленню, і сам заўсёды прыслухоўваецца да парад сваіх працоўных таварышаў.
— Век жыві — век вучыся, — адзначае суразмоўца. — Так ці інакш мы з калегамі дапамагаем адзін аднаму, нейкія веды, само сабой, набываем у працэсе работы. А як жа!..
Слухаючы гэтага сціплага чалавека, яго шчырыя словы, у чарговы раз становішся ўпэўненым у тым, што на нясвіжскай зямлі працуюць адданыя і руплівыя людзі.
Дык няхай жа ў іх абавязкова ўсё атрымліваецца!
Дар’я ПІВАВАРСКАЯ.
