Дарья Пивоварская Штогод у нашым раёне праходзіць краязнаўчая алімпіяда сярод вучняў па гісторыі і культуры горада Нясвіжа пад назвай “Мой горад — мая любоў”. Арганізатарамі выступаюць упраўленне па адукацыі, спорце і турызме райвыканкама і Нацыянальны гісторыка-культурны музей-запаведнік “Нясвіж”.
Традыцыйна, у канферэнц-зале і сёння сабраліся вучні з розных куткоў Мінскай вобласці: Барысаўскага, Маладзечненскага, Уздзенскага, Пухавіцкага, Вілейскага і нашага — Нясвіжскага раёнаў.
Звычайна конкурс праходзіць у два этапы, у першым — дыстанцыйным — прынялі ўдзел 123 вучні, у другі ж прайшлі толькі 21.
З уступным словам перад вучнямі выступілі старэйшы навуковы супрацоўнік сектара па навуковай і экскурсійнай рабоце “Палацавы ансамбль” Вячаслаў Мазалеўскі і загадчык раённым вучэбна-метадычным кабінетам упраўлення па адукацыі, спорце і турызме райвыканкама Таццяна Вайтовіч. Яны павіншавалі ўдзельнікаў з выхадам у другі тур, пажадалі поспехаў і творчага натхнення надалей.
У рамках алімпіяды школьнікам прапанавалі самыя разнастайныя пытанні аб архітэктурных і скульптурных помніках Нясвіжа, асноўных гістарычных падзеях, легендах, знакамітых людзях старажытнага горада, а таксама творчае заданне.
Пасля таго, як моладзь справілася з заданнямі, для іх правялі экскурсію па Палацу Радзівілаў, а затым аб’явілі вынікі.
Пераможцамі краязнаўчай алімпіяды сталі два вучні сярэдняй школа № 3 г. Нясвіжа Іван Кузняцоў і Надзея Хаванская. Другое месца аказалася ў руках трох дзяўчат: гімназісткі Елізаветы Раманоўскай і дзвюх вучаніц трэцяй школы — Міланы Сташэўскай і Міраславы Урыцкай. Дыпломамі трэцяй ступені былі ўзнагароджаны дзве гімназісткі — Ульяна Марцыноўская і Кацярына Воўчык, прадстаўніца Узденскай гімназіі Сафія Пацерава, а таксама вучань Стараюркавічскай СШ Любанскага раёна Мацвей Прахорык.
Сваімі ўражаннямі падзялілася адна з пераможцаў — Надзея Хаванская — вучаніца 8 класа трэцяй гарадской школы.
— Удзельнічаю ў такой алімпіядзе я ўпершыню. Прапанову атрымала ад сваёй настаўніцы. Насамрэч, мяне ахоплівае гонар і захапленне ад разумення таго, што я жыву ў такім дзіўным, жывапісным і незвычайным месцы. Паглыблена вывучаць цікавыя звесткі аб сваім краі я пачала не так даўно, але ўжо дастаткова назапасіла ведаў. Калі прагульваюся з сябрамі або бацькамі па вуліцах горада, абавязкова нешта ды і раскажу.
Самым займальным у пытаннях алімпіяды мне падалося творчае заданне. Там прасілі паразважаць над гербам Нясвіжа, прааналізаваць яго. Да гэтага ж было заданне падумаць, якія яшчэ архітэктурныя пабудовы, акрамя палаца князёў, могуць паслужыць эмблемай для Нясвіжа. У сваім адказе я прапанавала Ратушу, Слуцкую браму і, вядома, Касцёл Божага цела.
Пакінулі замак удзельнікі ў добрым настроі і з памятнымі падарункамі ў руках ад музея-запаведніка.
Дар’я ПІВАВАРСКАЯ.
