Нясвіжскія навіны Фестываль паэзіі У Нясвіжскай цэнтральнай раённай бібліятэцы адбыўся VII фестываль паэзіі “Голасам свайго пакалення”, прысвечаны беларускаму паэту, Ганароваму грамадзяніну горада Нясвіжа, ветэрану Вялікай Айчыннай вайны Паўлу Кузьмічу Пранузу. 18 сакавіка споўнілася 105 гадоў з дня яго нараджэння. Ён пісаў на працягу ўсяго жыцця на самыя розныя тэмы: пра любоў да Радзімы, мірную працу, каханне.
У фае бібліятэкі дзейнічала ілюстрацыйна-дакументальная выстава “Голасам свайго пакалення”. Тут можна было ўбачыць экспанаты, якія сам Паўлюк Прануза і яго дачка Алена Паўлаўна Лявіцкая падаравалі бібліятэцы — рукапісы вершаў, кнігі з бібліятэкі Паўла Кузьміча з аўтографамі паэтаў, з якімі ён сябраваў, асабістыя рэчы.
Паўлюк Прануза пражыў багатае і сумленнае жыццё. Дыяпазон яго творчасці вельмі шырокі, таму што пісьменнік глядзеў на жыццё і глыбока пранікаў ў яго таямніцы: ён бачыў у ім гераічнае і трагічнае, смешнае і павучальнае.
З-пад пяра аўтара выйшла больш за дваццаць кніг як для дарослых, так і для дзяцей. Настаўнік па адукацыі, ён праз усё жыццё пранёс любоў да дзяцей, вучыў іх, бараніў, не шкадуючы ўласнага жыцця, імкнуўся прывіць любоў да роднай мовы, прыгожага, разумнага, вечнага. З 1947 года Паўлюк Прануза з’яўляўся членам саюза пісьменнікаў. Павел Кузьміч цесна супрацоўнічаў з дзяржаўным музеем гісторыі беларускай літаратуры, у фонд якога яшчэ пры жыцці перадаў частку сваіх рукапісаў.
Падчас сваёй педагагічнай дзейнасці ў Нясвіжы, Павел Кузьміч кіраваў літаратурным аб’яднаннем, якое працавала пры раённай газеце. Паэт быў частым госцем рэдакцыі газеты, прыходзіў з падборкамі новых вершаў. Сваімі ўспамінамі падзялілася былы супрацоўнік рэдакцыі Раіса Хвір.
Павел Кузьміч разумеў: па тым, якімі стануць дзеці, будуць меркаваць, якімі былі іх бацькі і настаўнікі. Ён вельмі любіў сваіх унукаў, пісаў ім вершы, і яны спрабавалі пісаць, гледзячы на дзядулю. Унучка падавала ідэю, а ўнук рыфмаваў. Такая ў іх была сумесная творчасць.
Дзіцячыя вершы вельмі арганічна дапаўняюць і ўзбагачаюць твор- часць Паўлюка Пранузы. Сапраўдным доказам гэтага для гасцей і ўдзельнікаў фестывалю стала тэатральная пастаноўка “Быў я фантазёрам” тэатральнай студыі “Раптам” пад кіраўніц-твам Валянціны Штоп.
Удзельнікі фестывалю, адышоўшы ад прозы жыцця, акунуліся ў чароўны свет паэзіі. Цікава і весела прайшла сустрэча “Падарожжа ў свет дзівосаў”.
З захапленнем прынялі ўдзел у мерапрыемстве вучні малодшых класаў СШ №3 г. Нясвіжа і Нясвіжскай гімназіі. Дзеці адгадвалі загадкі, спаборнічалі ў вымаўленні скарагаворак, падчас “Паэтычных забаваў” разам з пісьменніцай і кіраўніком абласнога народнага клуба “Жывіца” Ірынай Карнаухавай з вялікім задавальненнем слухалі вершы ў выкананні аўтара, адказвалі на пытанні і адгадвалі загадкі. Займальная сустрэча прайшла ў форме жывых зносін.
У фестывальны дзень таксама адбылося адкрыццё выставы малюнкаў акварэллю, гуашшу, алоўкамі “У лабірынце лёсу і жыцця” па творчасці Паўлюка Пранузы, у якой прынялі ўдзел навучэнцы Нясвіжскага дзяржаўнага калледжа імя Якуба Коласа. Журы адзначыла лепшыя работы. Сярод пераможцаў — Юлія Журба, Арцём Белаус, Яна Шаўлюк, Валерыя Лешчанка, Аляксандра Журба, Мікіта Шышкоўскі, Елізавета Чаплінская.
Традыцыйна прайшоў і штогадовы конкурс чытальнікаў вершаў Паўла Пранузы, на які былі заяўлены 33 удзельнікі чатырох узроставых груп. Ацэньвала выступы ўдзельнікаў кампетэнтнае журы.
Па выніках конкурсу ў кожнай узроставай групе пераможцамі сталі першакласнік Марк Лагун, выхаванец цэнтра дзіцячай творчасці Нясвіжскага раёна і трэцякласнік СШ 4 г. Нясвіжа Максім Новік, якія раздзялілі І месца, вучань 4 класа Нясвіжскай гімназіі Данііл Паграбіцкі, якога рыхтавала Заазерская сельская бібліятэка, заняў ІІ месца, гімназістка-трэцякласніца Аліна Сысун, (ад Заазерскай сельскай бібліятэкі) — ІІІ-е, шасцікласнік Карцэвіцкай СШ Ула- дзіслаў Гегеня — І месца, вучаніца 5 кл. СШ 4 г. Нясвіжа Паліна Шэўчык — ІІ месца, гімназістка-пяцікласніца Ксенія Плакса — ІІІ месца, сямікласніца гімназіі Палі- на Шыбко (ад Заазерскай сель-скай бібліятэкі) — І месца, вучаніца 7 класа Сноўскай СШ Дар’я Валуева — ІІ месца, сямікласніца СШ №1 г. Нясвіжа Алеся Купцэвіч — ІІІ месца і яшчэ адна сямікласніца, толькі ўжо з СШ № 4 г. Нясвіжа Валерыя Прахода — ІІІ месца. У старэйшай узроставай групе перамагла вучаніца выпускнога класа Ліпскай СШ Дзіяна Ліцкевіч (ад Высокаліпскай інтэграванай сельскай бібліятэкі). ІІ месца заняла вучаніца 10 класа СШ №1 г. Нясвіжа Алеся Тароцька.
У рамках фестывалю адбылося рэаліці-шоў “Шанс для нявыдадзеных кніг”, у якім прынялі ўдзел сябры раённага літаратурна-музычнага аб’яднання “Валошкі”. Будучыя кнігі нясвіжскіх аўтараў, створаныя пакуль што толькі ў электронным выглядзе, падрыхтавала рэдактар бібліятэкі Алена Шастак. Быў вызначаны і пераможца. Ім стаў паэт з Гара- дзеі Аляксандр Яцук, які прэзентаваў паэтычны зборнік “О вечном”.
У свяце-фестывалі прынялі ўдзел паэт, празаік, перакладчык, лаўрэат Нацыянальнай літаратурнай прэміі, старшыня Мінскага гарадскога аддзялення Саюза пісьменнікаў Міхась Пазнякоў, член Саюза пісьменнікаў Беларусі Зоя Кулік, а таксама вядучы метадыст, доктар філалагічных навук, дацэнт дзяржаўнага музея гісторыі беларускай літаратуры Мікалай Трус, навуковы супрацоўнік дзяржаўнага музея гісторыі беларускай літаратуры, магістр філалагічных навук Дарыя Карчашкіна.
Удзельнікі свята — члены саюза пісьменнікаў Беларусі, супрацоўнікі Беларускага дзяржаўнага музея гісторыі беларускай літаратуры, сябры раённага літаратурна-музычнага аб’яднання “Валошкі”, наведвальнікі гуртка “Юны журналіст” СШ № 4 г. Нясвіжа сабраліся за “круглым сталом”, каб яшчэ раз успомніць добрым словам нашага знакамітага земляка — Паўла Кузьміча Пранузу.
Сонца яго паэзіі сагравае нас і сёння — усіх, каму дарагія спачуванне, ласка, шчырасць, хто не шукае для сябе палёгкі на доўгіх і кароткіх жыццёвых дарогах ды верыць, што на свеце ёсць дабрыня, што галоўная служба мастацтву заключана ў тым, каб прайсці праз вернасць гэтай дабрыні і чалавечнасці…
Людміла ЯСЕВІЧ,
загадчык аддзела
абслугоўвання і інфармацыі Нясвіжскай цэнтральнай
раённай бібліятэкі
імя Паўлюка Пранузы.
