Нясвіжскія навіны Наталля КУЛІК, дырэктар ДУА “Сярэдняя школа №4 г. Нясвіжа”:
— Для нашай школы словы “захаваць мір” — не проста прыгожы выраз. З мінулага года мы носім статус “Школа міру”. Нашы юныя міратворцы атрымалі яго дзякуючы вялікай працы, якую сумесна выканалі педагогі і навучэнцы. Добрыя справы, акцыі, конкурсы, дабрачынныя мерапрыемствы дазволілі нашай установе стаць удзельнікам праекта “Школы міру ў Рэспубліцы Беларусь”. Праект “Школа міру” аб’ядноўвае неабыякавых людзей, якія лічаць галоўным у сваім жыцці і дзейнасці ўмацаванне міру, сяброўства, узаемаразумення і згоды паміж народамі, увасабленне ў жыццё ідэй міласэрнасці і гуманізму. Наш удзел у гэтым праекце надасць нам новыя сілы і новы імпульс. “Школа міру” — гэта не проста статус, гэта яшчэ і вялікая адказнасць.
У сістэму работы школы ўключана правядзенне штогадовых мерапрыемстваў у гонар святкавання Перамогі ў Вялікай Айчыннай вайне, арганізацыя сустрэч моладзі з ветэранамі вайны, акцыі памяці і смутку, правядзенне мерапрыемстваў, прысвечаных патрыятычнаму і маральнаму выхаванню моладзі, дабрачынных акцый і мерапрыемстваў, накіраваных на аказанне дапамогі інвалідам, ветэранам вайны і працы, прапаганда нашай нацыянальнай гісторыі, падтрымка таленавітай моладзі. Праца па праекце накіравана на ўмацаванне дружбы паміж народамі незалежна ад веравызнання і нацыянальнасці, захаванне гістарычнай памяці аб подзвігу беларускага народа ў гады Вялікай Айчыннай вайны, клопат аб ветэранах вайны і працы, павышэнне ролі сям’і ў выхаванні падрастаючага пакалення, рэалізацыю важнейшых адукацыйных і культурных праграм, накіраваных на развіццё нацыянальнай культуры, захаванне гісторыка-культурнай спадчыны, падтрымку адораных дзяцей і маладых талентаў. Сумесны ўдзел педагогаў, дзяцей і бацькоў у нашых мерапрыемствах накіраваны на духоўнае развіццё, папулярызацыю здаровага ладу жыцця, захаванне сямейных каштоўнасцей, экалагічную бяспеку.
Праект “Школа міру” — гэта пачатак вялікага шляху па выхаванні ў дзецях міралюбнасці, актыўнай грамадзянскай пазіцыі і творчасці. Наша школа ўлілася ў гэты праект лёгка. Гэта не дзіўна, бо ва ўстанове адукацыі склалася дакладная і эфектыўная сістэма грамадзянска-патрыятычнага выхавання падрастаючага пакалення, працуюць прафесійныя, творчыя і адданыя сваёй справе педагогі. І самае галоўнае — гэта выхаванне дзяцей і моладзі на прынцыпах міру, сяброўства, узаемаразумення і згоды. Міратворцы — гэта вельмі адказная і важная місія.
