Софья ЛЮБАНЕЦ Сёння прыемны сюрпрыз чакаў воіна-інтэрнацыяналіста з Высокай Ліпы Аляксандра Радамана, пра подзвіг якога мы пісалі ў нумары “НН” ад 28 мая мінулага года. Яго наведаў баявы таварыш Аляксандр Мятла, адзін са стваральнікаў і дырэктар гісторыка-культурнага комплексу “Лінія Сталіна”, кіраўнік дабрачыннага фонду дапамогі воінам-інтэрнацыяналістам “Памяць Афгана”. Прычым наведаў не проста так, а з падарункам — наш зямляк атрымаў ад фонда карысную ў гаспадарцы рэч — мотаблок з усімі камплектуючымі айчыннай вытворчасці.
У нашай гутарцы Аляксандр Мятла расказаў, што з 1987 года служыў у складзе 56-й асобнай гвардзейскай дэсантна-штурмавой брыгады. Яго падраздзяленне ахоўвала дарогу Кабул — Гардэз у правінцыі Пакція.
— Мяне прывяло сюды афганскае брацтва, — адзначыў Аляксандр Міхайлавіч. — Мой цёзка Саша Радаман таксама служыў у свой час у Афганістане, у у трэцім батальёне 56-й дэсантна-штурмавой брагады і там быў цяжка паранены. Мы пазнаёміліся ў шпіталі, і я вырашыў, што гэта чалавек, які безумоўна дастойны дапамогі нашага фонда. Нягледзячы на цяжкае раненне, ён здолеў вярнуцца да нармальнага жыцця, стварыў сям’ю, сумленна адпрацаваў шмат гадоў у мясцовай гаспадарцы. Таму такі падарунак будзе яму вельмі дарэчы.
Дарэчы, за 21 год свайго існавання фонд дапамогі воінам-інтэрнацыяналістам “Памяць Афгана” зрабіў шмат добрых спраў — адных толькі легкавых аўтамабіляў ад гэтай арганізацыі атрымалі 110 былых воінаў-афганцаў.
І хаця ў цяперашні складаны час атрымліваць спонсарскія сродкі не так проста, фонд і яго кіраўнік працягваюць сваю добрую справу, да якой можа далучыцца кожны жадаючы, каб унесці свой пасільны ўнёсак у добрую справу дапамогі тым, хто пацярпеў ад удзелу ў лакальных канфліктах і годна выканаў свой грамадзянскі абавязак.
Соф’я ЛЮБАНЕЦ.
Фота Ірыны ЛУЧЫНОВІЧ.
