Нясвіжскія навіны Сельгаспрадпрыемствы Нясвіжчыны прыступілі да сяўбы цукровых буракоў. Згодна з аператыўнай інфармацыяй райсельгасхарчу, па стане на раніцу 14 красавіка у ДП “Эксперыментальная база “Свеклавічная” іх было пасеяна 35 га, у ААТ “17 Верасня” — 23 га, у ААТ “НОВАЕ ЖЫЦЦЁ” — 6 га. У дзвюх першых гаспадарках бурачныя сеялкі 14 красавіка таксама працавалі. Наперадзе ў буракаводаў — вялікая работа. Салодкі корань яны будуць вырошчваць на 4500 гектарах.
Працягваецца сяўба яравых збожжавых і зернебабовых культур. На раніцу пятніцы яны занялі 2240 га, або 64% да плана. На фінішную прамую выйшлі ААТ “Нясвіжскія Астроўкі” і “Гарадзея”, СВК “Агракамбінат Сноў” і ДП “ЭБ “Свеклавічная”. ААТ “17 Верасня” свае неабходныя 30 га ўжо, вядома, пасеяла. Кожны дзень збожжавы яравы клін прырастае ў раёне ў сярэднім на 600 га. Сеюць ячмень, пшаніцу, зернебабовыя.
У цэлым яравая сяўба праведзена на плошчы 2382 га (11%).
Падрыхтавана пад яе 2826 га плошчы — 13 % да плана. У працэнтных адносінах у разрэзе гаспадарак першая пяцёрка выглядае наступным чынам: ДСГУ “Нясвіжская сортавыпрабавальная станцыя” — 28 %, ДП “ЭБ “Свеклавічная” — 27 %, ААТ “17 Верасня” — 20 %, ААТ “Лань-Нясвіж” — 19 %, ААТ “Гарадзея” — 18 %.
Выконваецца шмат іншых палявых работ. Механізатары закрываюць вільгаць у глебе, аруць глебу, дыскуюць, уносяць угнаенні, падкормліваюць травы, барануюць іх.
Значная работа праводзіцца на азімых. У прыватнасці, у другі раз падкормлены азотам збожжавыя на зерне на 13112 гектарах — 82% да плана. Завяршылі другую падкормку “Нясвіжскія Астроўкі”, “Грыцкевічы”, “НОВАЕ ЖЫЦЦЁ”, “Юшавічы”, “Сейлавічы”, “Агракамбінат Нясвіжскі” і “ЭБ “Свеклавічная”. Азімы рапс на зерне другі раз атрымаў сілкаванне на плошчы ў 78 % да плана.
На ўчастках азімых збожжавых і рапса, дзе неабходна, праведзены хімахоўныя работы ад хвароб і шкоднікаў, хімічная праполка.
Тамара ПРАЛЬ-ГУЛЬ.
