Нясвіжскія навіны Сёння серада — сярэдзіна рабочага тыдня. У кожнага з нас — свае абавязкі, свае клопаты, за якімі ненарокам можна і забыцца, што гэтыя цудоўныя вясновыя дні — не зусім звычайныя, бо менавіта зараз — з 8 па 15 красавіка — у нашым раёне, як і ва ўсёй Мінскай вобласці, праходзіць рэспубліканская добраахвотная акцыя “Тыдзень лесу”. Яна праводзіцца ў Беларусі ўжо 16-ы раз, і ў гэтым годзе прысвечана Году міру і стваральнай працы.
Чаму ж дрэвы такія важныя для ўсіх нас?
Па-першае, яны, як пыласос, праганяюць праз сябе забруджанае паветра, чысцячы яго і насычаючы жыватворным кіслародам. У вялікіх гарадах дрэвы абараняюць нас ад лішку пылу і выхлапных газаў, нейтралізуюць аксіды азоту і вугляроду.
Па-другое, затрымліваючы дажджавую ваду, яны прадухіляюць такія катастрафічныя з’явы, як паводкі і апоўзні. Развітая каранёвая сістэма працуе як фільтр, затрымліваючы забруджвальныя рэчывы, а таксама спрыяе пранікненню вільгаці ў глыбейшыя гарызонты глебы. Дарослае вечназялёнае дрэва здольна затрымліваць 15 000 літраў вады ў год!
Па-трэцяе, нават адно дрэва можа быць домам для сотняў відаў жывых істот, сярод якіх — імхі, лішайнікі, грыбы, казуркі, паўзуны, птушкі і млекакормячыя.
Многія дрэвы жывуць сотні гадоў, а некаторыя — нават тысячы. У залежнасці ад узросту фармуецца і асяроддзе для пасялення розных жывёл. Мядзведзі і птушкі, ласі і драўняныя жабы, вавёркі і лятучыя мышы — усё гэта біяразнастайнасць, якую мы захоўваем, захоўваючы лес.Па-чацвёртае, лес дае работу людзям розных спецыяльнасцей: лесаводам, лесанарыхтоўшчыкам, навукоўцам-даследчыкам і многім іншым. Мы выкарыстоўваем драўніну для будаўніцтва, для апалу і падрыхтоўкі ежы. Самі дрэвы даюць людзям плады, ягады і арэхі — усё тое, што цяпер называецца здаровым харчаваннем.
Па-пятае, дрэвы ратуюць наша здароўе, дапамагаюць зменшыць стрэс, неспакой і дазваляюць нам аднавіць сувязь з прыродай. Менавіта таму пацыенты ў палаце з выглядам на дрэвы здаравеюць хутчэй, чым тыя, у якіх такога выгляду няма.
Ці патрэбны яшчэ аргументы, каб заклікаць вас, паважаныя суайчыннікі, паўдзельнічаць у такой надзвычай карыснай справе, як “Тыдзень лесу”? І для гэтага зусім неабавязкова герой-скі засадзіць будучым лесам цэлы гектар. Дастаткова пасадзіць хаця б адно дрэва — каля сваёй хаты, у двары шматкватэрнага дома, на дачы… Так мы дакажам справай, а не словамі, сваю любоў да роднай зямлі і клопат пра здаровую будучыню сваіх дзяцей.
