Нясвіжскія навіны На Нясвіжчыне шмат помнікаў, якія прыцягваюць увагу турыстаў і мясцовых жыхароў.
Прапаную вам пазнаёміцца з адным з іх.
Устаноўка скульптуры льва пры ўваходах у гарады, замкі, палацы і паркі — традыцыя, якая існуе са старажытных часоў у многіх культурах. І ва ўладаннях Радзівілаў яны таксама былі ўпрыгожваннем. У 2014 годзе скульптура цара звяроў з’явілася ў гістарычнай частцы горада, у скверы ля Слуцкай брамы.
Бронзавы леў сядзіць на камяні, паклаўшы кіпцюрыстую лапу на шчыт з гербам Нясвіжа. Каля скульптуры ў невялікім скверы — фантан з лаўкамі. Месца для ўстаноўкі скульптуры было абрана не выпадкова, бо некалькі стагоддзяў таму менавіта тут размяшчаўся адзін з уваходаў у горад, таму бронзавы вартавы быў усталяваны на гэтым месцы. Леў, які прытрымлівае лапай шчыт, спраўна нясе сваю варту, стаўшы адной з самых папулярных адметнасцей старажытнага Нясвіжа.
Марыя АЛЯКСЕЕВА.
