Нясвіжскія навіны На Нясвіжчыне актыўна вядуцца асеннія палявыя работы. Але калі для збожжавых гэты год быў вельмі спрыяльны, то для кукурузы, наадварот, атрымліваецца складаным.
— Звычайна мы пачыналі ўборку пачаткаў у верасні, дзесьці пасля дзясятага, — расказвае галоўны аграном ААТ “Сейлавічы” Юрый Андрэйчук. — Але ў гэтым годзе камбайны выйшлі ў поле раней — у канцы жніўня. Прыйшлося так рана пачынаць, таму што праз адсутнасць дажджоў кукуруза пачала моцна засушвацца.
Усяго на яе ў гаспадарцы адведзена 550 гектараў. З іх 100 — на зерне і 450 — на сілас. Па стане на 14 верасня ўбрана 36 % плошчаў (198 га гэтай культуры на сілас). Для неспрыяльных умоў надвор’я ўраджайнасць добрая — 346 цэнтнераў з гектара.
“Царыцу палёў” убіраюць два механізатары: на камбайнах “КВК-800” пазменна выходзяць у поле Дзмітрый Ланкевіч і Юрый Зубовіч.
— У мінулым годзе мы ўбіралі кукурузу пры такім надвор’і, як на гэтым тыдні — тады таксама перыядычна ішоў дождж, — успамінае Дзмітрый Ланкевіч. — У нашай працы складана планаваць — з раніцы можаш чакаць аднаго, а ў выніку — усё складваецца інакш. Але ж найбольш прыемна займацца сваёй справай, калі і тэхніка не падводзіць, і надвор’е спрыяе. У сельскай гаспадарцы кожны сезон значны і праца заўсёды знойдзецца. Ад вясны да восені я задзейнічаны на ўборцы: спачатку сурэпіцы, потым — сенажу і на падборцы саломы, а напрыканцы — кукурузы. І ўвесь гэты час патрэбна кожны дзень надаваць увагу тэхніцы. Ад напружанай працы ўсё знашваецца, таму кожную раніцу пачынаю з абслугоўвання камбайна. Без гэтага — ніяк.
Неаніла ЛЮБАНЕЦ.
