Знаходзіць падыход да пакупніка

Дырэктар магазіна “Еўраопт” г. Нясвіжа Алена Шыманская ўвайшла ў лік лепшых сярод работнікаў гандлю, грамадскага харчавання, сферы абслугоўвання і паслуг.
Ураджэнка суседняй Стаўбцоўшчыны, яна прыехала ў Нясвіж ў 1979 годзе па размеркаванні пасля заканчэння Мінскага гандлёва-эканамічнага тэхнікума. Свой працоўны шлях пачала ў гархарчпрамгандлі, затым завочна скончыла тагачасны Мінскі інстытут народнай гаспадаркі імя Куйбышава (зараз БДЭУ), шмат гадоў аддала кіраўніцтву магазінам “Універсам”. Калі ж у 2012 годзе даведалася, што ў горадзе плануецца адкрыццё новага магазіна вядомай сеткі “Еўраопт”, падала заяўку на ўдзел у конкурсе на месца дырэктара. І перамагла.

— Вядома, адразу было нялёгка, — гаворыць Алена Антонаўна, — работа тут пабудавана па-іншаму — больш сучасна, больш напружана, магазін ахоплівае шмат катэгорый тавару — ад прадуктаў харчавання да прамысловых вырабаў і бытавой хіміі, аднак, на шчасце, са мной сюды перайшло некалькі калег з былой работы, таму мы даволі хутка наладзілі адносіны ў калектыве, размеркавалі абавязкі, і справа пайшла. Кожны спецыяліст у нас займаецца пэўным накірункам: адзін адказвае за тавар, які хутка псуецца, другі — за прыёмку новых паступленняў, трэці — за правільнасць дакументацыі і г.д. Вельмі дапамагае камп’ютарная праграма, якую прыйшлося тут асвоіць: з яе дапамогай мы адсочваем, колькі і якога тавару нам трэба, бачым яго наяўнасць на складах, робім заяўкі і г.д.
Пад кіраўніцтвам А.А. Шыманскай працуе 46 чалавек, магазін ідзе ў нагу з часам: у мінулым годзе ў ім адкрыліся тры касы самаабслугоўвання, дзе пакупнікі могуць самастойна хутка аплаціць усе тавары па картцы, а калі што-небудзь не будзе атрымлівацца, на дапамогу адразу прыйдуць супрацоўнікі магазіна.
— Галоўнае для работніка гандлю, — адзначыла ў завяршэнне нашай гутаркі Алена Антонаўна, — умець знаходзіць падыход да пакупніка, быць стрэсаўстойлівым. У нашым калектыве шмат вопытных, добрых працаўнікоў, і, я думаю, мы зробім усё магчымае, каб людзям і надалей падабалася да нас заходзіць.
Соф’я ЛЮБАНЕЦ.