Нясвіжскія навіны 
Аператарам па штучным асемяненні жывёлы Святлана Фянько працуе шэсць гадоў. Дагэтуль 23 гады даглядала яе тут жа, на комплексе цялушак у ААТ “17 Верасня”. Мы пагутарылі
са Святланай Віктараўнай.
— Цікава, хто быў ініцыятарам, каб Вы памянялі прафесію?
— Наша заатэхнік-селекцыянер Таццяна Уладзіміраўна Утко. Яна настойліва прапанавала, каб я паехала на вучобу. А я і згадзілася. Прайшла курсы па падрыхтоўцы аператараў штучнага асемянення, атрымала адпаведнае пасведчанне.
— Работа даволі адказная. Ад яе ў многім залежыць прадуктыўнасць дойнага статка ў гаспадарцы ў цэлым. Варта нагадаць: на адну фуражную карову летась у ААТ “17 Верасня” было надоена ў сярэднім па 9169 кг малака, на 689 кг болей, чым было ў 2020-м. Расскажыце трошкі пра тэхналогію ўтрымання маладняку на вашым комплексе.
— З малочнатаварных фермаў гаспадаркі да нас прывозяць цялушак 3-месячнага ўзросту. Яны важаць 150 — 160 кілаграмаў. На асемяненне ідуць у 15-16 месяцаў і маюць вагу 380 — 420 кг. Пры сцельнасці сем месяцаў цялушак ад нас забіраюць назад на фермы.
— Каб паспяхова працаваць у гэтай галіне, жывёлу трэба любіць. Адкуль у Вас такая прыхільнасць да яе?
— Я — чалавек вясковы. Нарадзілася тут, у Вялікай Ліпе (зараз жыву ў Высокай Ліпе). У бацькоўскай гаспадарцы заўсёды была свойская жывёла, і мы дапамагалі яе даглядаць. Мая мама, Зоя Мікалаеўна Малеж, і цяпер трымае дзве каровы. А мы ёй дапамагаем — у мяне тры сыны, яны з ахвотай працуюць у бабулі.
Дарэчы, мама некаторы час таксама працавала на нашым комплексе даглядчыцай. І мая сястра Кацярына занята ў гэтай галіне, яна — аператар па штучным асемяненні жывёлы ў адной з гаспадарак Стаўбцоўскага раёна.
— Вы не толькі добры работнік, але і шматдзетная мама. Раскажыце, калі ласка, пра сваіх памочнікаў.
— Старэйшаму сыну Міхаілу — 23 гады. Ён закончыў Ляхавіцкі каледж, завочна вучыцца ва ўніверсітэце ў Баранавічах, працуе аграномам-насенняводам у нашай гаспадарцы. Аляксандру, студэнту БНТУ, хутка васямнаццаць. Мацвей займаецца ў трэцім класе.
У завяршэнне нашай размовы застаецца сказаць, што добрасумленную працаўніцу Святлану Фянько кіраўніцтва адкрытага акцыянернага таварыства дэлегавала на раённы злёт перадавікоў.
Інтэрв’ю правяла
Тамара ПРАЛЬ-ГУЛЬ.
