Нясвіжскія навіны Вольга Піліпаўна Плакса нарадзілася ў 1908 годзе ў вёсцы Малева, выйшла замуж у Асмолава і засталася тут назаўсёды. Пасля вайны і да самай пенсіі працавала ў мясцовай гаспадарцы. Была даяркай, паляводам — заўсёды на добрым рахунку. Напярэдадні Міжнароднага Дня пажылых людзей найстарэйшую жыхарку Нясвіжскага раёна наведалі прадстаўнікі мясцовай улады і грамадскіх аб’яднанняў на чале з намеснікам старшыні Нясвіжскага райвыканкама Аляксандрам Балцянковым. Нягледзячы на свой шаноўны узрост, Вольга Піліпаўна выйшла насустрач гасцям бадзёрай хадой і ў прыўзнятым настроі. Яна падзякавала ўсім за шчырыя віншаванні і падарункі і запрасіла да стала, дзе загадзя прыгатавала пачастунак. Гэты дзень для яе заўсёды даўгачаканы — столькі прыемных эмоцый, ўражанняў — сапраўднае свята.
Наталля ЕРМАШЭНКА.
