Нясвіжскія навіны Законы прыроды пабудаваны такім чынам, што дзеці павінны быць пад наглядам бацькоў. Няшчасныя выпадкі адбываюцца ў месцах, дзе малыя любяць гуляць або знаходзяцца без нагляду дарослых. Бацькі абараняюць сваё дзіця не толькі ад небяспечнага траўміравання, але і яго здароўе ад сваіх хвароб, шкодных звычак, стомы, пагроз навакольнага асяроддзя.
Няшчасныя выпадкі — следства таго, што бацькі занадта занятыя. Гэта нядзіўна, бо большасць з нас выконвае па меншай меры дзесяць тысяч розных абавязкаў, адначасова прыглядаючы за малымі. Але гэта яшчэ не ўсё.
Маленькія дзеці не ўсведамляюць рызыкі — у іх проста няма вопыту, які падказаў бы, што можа нашкодзіць ім, а што — не. Яны не бачаць адрозненняў, напрыклад, паміж небяспечнымі рэчывамі з непрыемным смакам і бяскрыўднымі прадуктамі харчавання, пакуль ім не споўніцца прыкладна тры гады.
Шмат трагедый разыгрываецца менавіта дома. Таму не лішнім будзе нагадаць нашым сыночкам ці дачушкам асноўныя небяспекі, якія могуць іх чакаць дома, а таксама аб тым, як гэтага пазбегнуць.
Небяспека першая — вострыя, колючыя і рэжучыя прадметы. Іх абавязкова трэба класці на свае месцы. Парадак у хаце — не толькі для прыгажосці, але і для бяспекі.
Небяспека другая — электрычныя прыборы. Яны могуць ударыць токам або стаць прычынай пажару.
Правіла 1. Выходзячы з хаты ці нават з пакоя, абавязкова выключай тэлевізар, магнітафон, прас і іншыя электра-прыборы.
Правіла 2. Ніколі не цягні за электрычны провад рукамі.
Правіла 3. Ні ў якім разе не падыходзь да аголеных правадоў і не датыкайся да іх.
Небяспека трэцяя — лекі і бытавая хімія.
Правіла 1. Ні ў якім разе не спрабуй ніякіх лекаў. Па-першае, гэта нясмачна, а па-другое, няправільна прынятыя лекі могуць апынуцца ядам.
Правіла 2. Што такое бытавая хімія? Гэта пральныя парашкі, сродкі для мыцця посуду, сродкі ад прусакоў і многае іншае. Дзеці, канешне, не прусакі, але яд ад прусакоў дзейнічае і на людзей. Таму ні ў якім разе не адкрывай ніякіх упаковак з бытавой хіміяй.
Небяспека чацвёртая — газ.
Газ можа быць вельмі небяспечным. Па-першае, пары газу, што назбіраліся на кухні, могуць выбухнуць. Па-другое, ім можна атруціцца. Таму, адчуўшы пах газу, прытрымлівайся наступных правіл:
Правіла 1. Тэрмінова скажы аб гэтым дарослым.
Правіла 2. Адразу ж адкрый вокны і выветры кватэру.
Правіла 3. Правер, ці зачынены краны на пліце.
Правіла 4. Неадкладна патэлефануй па нумары 104.
Правіла 5. Ні ў якім разе не ўключай святло і не запальвай запалкі.
Служба 101 звяртаецца да вас, паважаныя бацькі. Памятайце, што дзіцячая бяспека залежыць ад нас. Задача дарослых — не толькі пастаянна апекаваць і аберагаць малых, мы проста абавязаны навучыць іх клапаціцца пра сябе. І тады беды абыдуць нас і нашых малых бокам!
“НН”.
