Нясвіжскія навіны У суботу, 20 красавіка, Старшыня Савета Рэспублікі Нацыянальнага сходу Рэспублікі Беларусь Міхаіл Мясніковіч прыняў удзел у рэспубліканскім суботніку на сваёй малой радзіме — у аграгарадку Сноў.
Спачатку ён правёў прыём грамадзян у памяшканні сельскага Савета дэпутатаў. З асабістымі пытаннямі да Міхаіла Уладзіміравіча звярнуліся шэсць жыхароў аграгарадка і навакольных вёсак. Пытанні, што турбавалі людзей, у асноўным звязаны з працаўладкаваннем у пенсійным узросце, асфальтаваннем дарог, пракладкай водаправода, добраўпарадкаваннем не толькі цэнтральных вуліц, але і малых завулкаў. “Калі зварот ёсць — трэба рэагаваць, па магчымасці аператыўна, на месцах. Бо калі людзі выказваюць свае прапановы, адзначаюць некаторыя праблемы — гэта паказчык развітай грама- дзянскай супольнасці”, — рэзюмаваў Міхаіл Мясніковіч. Ён дадаў, што ў Нясвіжскім раёне паспяхова вырашаюцца пытанні сацыяльна-эканамічнага развіцця. І гэта не толькі заслуга кіраўнікоў, але і, безумоўна, саміх жыхароў. Да мясцовай адміністрацыі і насельніцтва спікер звярнуўся са словамі падзякі і выказаў удзячнасць за стараннасць і працавітасць, якія дазваляюць квітнець яго малой радзіме.
Старшыня Нясвіжскага райвыканкама Аляксандр Ломскі, які прымаў удзел у прыёме грамадзян разам з членам Савета Рэспублікі, старшынёй СВК “Агракамбінат Сноў” Мікалаем Радаманам, зазначыў, што ўсе агучаныя пытанні будуць узяты пад пільную ўвагу ўлады і ў хуткім часе станоўча вырашаны.
Далей Міхаіл Мясніковіч прыняў удзел у пасадцы Алеі Памяці ў гонар 75-годдзя вызвалення Рэспублікі Беларусь ад нямецка-фашысцкіх захопнікаў. Дубы, пасаджаныя Старшынёй Савета Рэспублікі, мясцовай адміністрацыяй, ветэранамі працы і лепшымі навучэнцамі Сноўскай сярэдняй школы, сімвалізуюць жыццё і сувязь пакаленняў, а таксама ўдзячнасць воінам-вызваліцелям. “На сноўскай зямлі ў час вайны загінулі 94 нашы землякі, што нямала. У гонар іх і заклалі гэтую алею як памяць на доўгія гады”, — адзначыў Міхаіл Мясніковіч. Ён звярнуў увагу, што суботнік — гэта не проста працэс навядзення парадку на тэрыторыях. Чысціня і дабрабыт на зямлі павінны быць заўсёды. Гэта мерапрыемства — пытанне самадысцыпліны, а таксама працоўнае свята.
Пасля высадкі дрэў Міхаіл Мясніковіч, адміністрацыя і мясцовыя жыхары адправіліся на тэрыторыю былога ваеннага шпіталя, размешчанага на тэрыторыі палацава-паркавага ансамбля Рдултоўскіх, дзе намечаны рамонтна-будаўнічыя работы. “У мінулым годзе мы тут ужо часткова добраўпарадкавалі тэрыторыю, цяпер хацелася б зрабіць усё неабходнае, каб прадухіліць разбурэнне гэтага гістарычнага аб’екта. За гэты час быў зроблены рамонт даху і вадасцёкаў. Але хацелася б, каб усе рашэнні па добраўпарадкаванні тэрыторыі былі матэрыялізаваныя ў бліжэйшы час”, — звярнуў увагу спікер.
Пасля заканчэння суботніка ён правёў рабочую нараду па пытаннях аднаўлення і далейшага выкарыстання палацава-паркавага комплексу.
Дзмітрый ЯШЧАНКА.
