Нясвіжскія навіны На палях ААТ “Нясвіжскія Астроўкі” бурліць жыццё, вясной фронт работ у аграрыяў немалы. Так, у мінулую суботу механізатар Анатоль Чыркун правёў ужо другую падкормку азімага рапсу азотнымі ўгнаеннямі. Культура на ўсіх 150 га нядрэнна перазімавала і ў цэлым знаходзіцца ў добрым стане. Зараз механізатар працягвае догляд шматгадовых траў. На ўчарашнюю раніцу мінеральныя ўгнаенні былі ўнесены на 212 гектарах, што складае 44 працэнтаў ад плана.
Механізатар Анатоль Чыркун і галоўны
аграном гаспадаркі Аляксей Грох
Як расказаў галоўны аграном гаспадаркі Аляксей Грох, з паня-дзелка ў гаспадарцы пачалі сяўбу шматгадовых траў. Іх Аляксандру Сукалу трэба пасеяць на плошчы 61 га. У аптымальныя агранамічныя тэрміны тут пасеялі і яравыя збожжавыя культуры — з 21 па 30 сакавіка. Буракі пачнуць сеяць, як толькі глеба прагрэецца да +5 — +7 градусаў. На палі ў поўным аб’ёме ўнесены мінеральныя ўгнаенні — фосфар і калій, азот жа будзе ўносіцца непасрэдна перад сяўбой. Таксама пад цукровыя буракі і кукурузу сёлета неабходна было ўнесці 17 тысяч тон цвёрдых арганічных угнаенняў. З гэтым у гаспадарцы ўжо справіліся на 90 %. Работы вядуць Юрый Манулік, Аляксандр Ражко і Уладзімір Жэрка.
Яравы клін у гэтым годзе ў “Нясвіжскіх Астроўках” складзе 1416 гектараў. На 441 га пасеяны ячмень, на 15 га — авёс. 30 гектараў зоймуць зернебабовыя культуры, 150 — кукуруза на зерне, 400 — кукуруза на сілас. На 280 гектарах размесцяцца цукровыя буракі, на 100 — аднагадовыя травы. На ўсёй пасяўной плошчы механізатары закрылі вільгаць, зараз вядзецца ворыва, палі рыхтуюцца пад сяўбу цукровых буракоў.
Аксана Грох.
