Нясвіжскія навіны У снежні 1990 года Генеральная Асамблея ААН прыняла рашэнне аб святкаванні Міжнароднага дня пажылых людзей. У Беларусі ўшанаванне сталых грамадзян пачалося праз год, і кожны раз яно праходзіць ва ўсіх рэгіёнах краіны. Да тых, хто шмат гадоў дбайна працаваў на карысць Радзімы, праяўляецца ўвага і павага.
На Нясвіжчыне стала добрай традыцыяй вітаць жанчын і мужчын пажылога ўзросту, і асабліва тых, хто па розных прычынах жыве адзінока ці хварэе. Так, супрацоўнікі раённага тэрытарыяльнага цэнтра сацыяльнага абслугоўвання насельніцтва Галіна Бушмакіна, Наталля Дзігмунтовіч і Ганна Міхайлік разам з калектывам хору ветэранаў працы “Аптымісты” выехалі ў Гарадзейскую бальніцу, раздалі пацыентам салодкія падарункі і сродкі індывідуальнай гігіены. Артысты хору выступілі з канцэртнай праграмай, у якой прагучалі творы беларускіх і рускіх аўтараў.
Затым мы накіраваліся ў гасцёўню вёскі Слабада, дзе таксама шчыра віталі пажылых людзей, супрацоўнікі цэнтра уручылі ім падарункі. Вяскоўцы, якія сабраліся ў мясцовым клубе, дружнымі апладысментамі сустракалі выступленне нясвіжскіх артыстаў. Асабліва ім спадабаліся песні “Мне мама ціха гаварыла” і “Барадзіно” ў выкананні мужчынскай групы хору. У канцы ад жыхароў вёскі артыстам уручылі кветкі.
Раіса ХВІР,
удзельніца хору ветэранаў
працы г. Нясвіжа “Аптымісты”.
