Нясвіжскія навіны Алена Сяргееўна Каляда, буртаўкладчык на Гарадзейскім буракапрыёмным пункце ААТ “Гарадзейскі цукровы камбінат”:
— У Палацы Рэспублікі я была ўпершыню. Мне было вельмі прыемна перад святочным канцэртам у фае Палаца, на выставе лепшых прадпрыемстваў вобласці ўбачыць прыгожы стэнд роднага камбіната. — Я адчувала гонар, калі бачыла, як людзі, запрошаныя на свята, падыходзілі і цікавіліся прадукцыяй — канфіцюрамі, сокамі, джэмамі, цукрам. І мы падышлі, прадэгуставалі — уcім спадабалася!
Ужо 37 гадоў я працую на камбінаце, прыйшла на прадпрыемства адразу пасля заканчэння школы. З цягам часу набралася вопыту і перадаю яго маладым калегам. Неаднаразова ўзнагароджвалася Ганаровымі граматамі Нясвіжскага райвыканкама, на прадпрыемстве была прызнана лепшай па прафесіі, а мой фота-здымак быў размешчаны на Дошцы гонару ААТ “Гарадзейскі цукровы камбінат”. Разам з мужам, Станіславам Іванавічам, які таксама працуе на цукровым камбінаце, у павазе да людзей працы выгадавалі дачку і сына, які разам з намі працуе на прадпрыемстве. Прыемна, што, калі вырашалі, каго дэлегаваць на ўрачыстасць, прысвечаную 80-годдзю Міншчыны, абралі мяне. Канешне, пасля такога мерапрыемства прыемных успамінаў — мора. У пачатку нам прадэманстравалі вельмі цікавы фільм пра Мінскую вобласць, пасля быў канцэрт, у якім удзельнічаў і заслужаны артыст БССР Анатоль Ярмоленка.
Яшчэ мяне вельмі ўразілі сваім вясёлым выступленнем дзеці з Аношак — удзельнікі ўзорнага ансамбля гарманістаў “Аношкаўскія музыкі”. Сама я таксама родам з вёскі ў Нясвіжскім раёне, з Еська-вічаў, таму з асобым пачуццём адзначыла, як добра хлопчыкі ігралі, як узнялі настрой гледачам, як цёпла іх прымалі прысутныя.
Прыгожая зала, цудоўны канцэрт, мы сядзелі на першым радзе і змаглі вельмі блізка разгледзець артыстаў, нават зняць на тэлефон, потым родным я дала справаздачу: дзе была і каго бачыла. Ды і наогул: пераглядаю гэта відэа і хочацца глядзець і глядзець — так было ўзнёсла і цікава.
Вольга МАРЧАНКА.
Фота Соф’і ЛЮБАНЕЦ і Наталлі ЕРМАШЭНКА.
